Policia ka arrestuar një 19-vjeçare me inicialet S.K., e cila dyshohet se shfrytëzonte për prostitucion dy motra, njëra prej të cilave e mitur.
Sipas autoriteteve, dy motrat e shfrytëzuara, A.A., 19 vjeçe, dhe motra e saj 15-vjeçare, janë proceduar penalisht në gjendje të lirë.
Operacioni “Multiple” u finalizua pas një hetimi dy-mujor nga Seksioni për Hetimin e Trafiqeve të Paligjshme dhe Narkotikëve në DVP Berat, në bashkëpunim me Prokurorinë e Beratit dhe Drejtorinë e Forcës së Posaçme Operacionale të DPPSh-së.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Berat për veprime të mëtejshme.
