Një incident i dhunshëm ka ndodhur pasditen e sotme në plazhin e Shtëpisë së Pushimit të Ministrisë së Brendshme në Durrës, i njohur ndryshe si “Kavaleshenca”.
Në përplasje janë përfshirë disa pushues dhe një punonjës i plazhit, i cili kishte detyrën të mbante rendin dhe të kujdesej për çadrat.
Ngjarja ka nisur pas një paralajmërimi të punonjësit ndaj dy të rinjve që po luanin me top pranë zonës së çadrave, duke shqetësuar pushuesit e tjerë.
Debati verbal mes tyre ka degjeneruar në dhunë fizike, pasi të rinjtë dyshohet se e kanë shtyrë punonjësin, duke e rrëzuar në tokë.
Për fat të mirë, situata nuk zgjati shumë dhe u neutralizua shpejt nga ndërhyrja e pushuesve të tjerë, shumë prej të cilëve janë punonjës policie që ndodheshin rastësisht aty dhe arritën të qetësonin palët e përfshira.
Megjithëse përplasja nuk është raportuar në polici dhe ngjarja u mbyll pa pasojë të mëtejshme, disa prej pushuesve e kanë konsideruar situatën shqetësuese, duke ngritur pikëpyetje për sigurinë në një prej plazheve që supozohet të jetë ndër më të mbrojturit.
