Pak minuta më parë, kryeministri Edi Rama ka zhvilluar një bashkëbisedim me gazetarët ku ka sqaruar edhe njëherë çështjen për shembjen e Tetarit Kombëtar që po mbrohet nga artistë e shumë qytetarë.
Rama tha se debati në lidhje me Teatrin Kombëtar duhet të ishte mbyllur 20 vite më parë, e ndërsa për ata që e kanë akuzuar kryeministrin se është duke prishur një trashëgimi kulturore, Rama u ka kthyer një përgjigje.
Kryeministri ka thënë se punimet te Teatri janë shumë të vjetra, por sipas tij ka shumë njerëz që ngatërrojnë muret me historinë, historinë e nostalgjinë. Por, askush nuk mund të akuzohet për mungesë vëmendjeje, apo ndjeshmërie ndaj trashëgimisë.
Rama është shprehur se ka qenë pikërisht ai që i ka bërë përpjekjet më të mëdha në ndryshimin e gjërave për mirë, pasi më parë edhe kompleksi i ministrive ishte ku binin suvatë dhe mbi tarracën e tyre mbinin fiqtë.
“Godina e Teatrit nuk është një çështje verbërie apo indiference, por realiteti, një godinë e ndërtuar nga ushtria italiane me material të përkohshëm, jo për të qenë Teatër Kombëtar, por për argëtim pas pune. Nuk ka qenë aty teatri me planin italian apo pas luftës.
Ka mbetur gjë e përkohshme gjithë jetën si rezultat i pamundësive, sot është e degraduar, është e pariparueshme. Nëse do të kishte vlerë nga pikëpamja arkitektonike dhe nëse do të i kishte hapësirat për teatër atëherë nuk do të ishte e mundur të restaurohej, por të shembej dhe rindërtohej. Asnjë centimetër nuk do të përdoret për zhvillim privat. Asnjë.
Zhvillimi privat pas rrethimit të teatrit. Me projektin e ri kërkojmë shumë më tepër fond me privatin për ta këmbyer me një truall pas teatrit ku ka ferra, vlera që i marrim këtij trualli është një teatër i ri.
Muzeu do të jetë brenda godinës së re të teatrit. Çështja është politike, mediokritet dhe kapur pas asgjësë për të bërë zhurmë. I respektoj ata që janë kundër, por nuk mund të jemi të gjithë dakord me ato që bëjmë, shumica është e qartë në këtë drejtim”, është shprehur Rama para gazetarëve.
