Gjykata Kushtetuese ka vendosur pranimin e ankimimit të presidentit Ilir Meta, në lidhje me vendimin e Këshillit të Ministrave, për të kaluar Teatrin Kombëtar në pronësi të Bashkisë së Tiranës. Kjo padi e Metës u depozitua më 14 maj, 3 ditë përpara se Teatri Kombëtar të shembej më 17 maj.
Gjykata Kushtetuese do të vlerësojë tani nëse kalimi i pronësisë së godinës nga Ministria e Kulturës tek Bashkia e Tiranës është i ligjshëm apo jo. Vetë Meta në qëndrimin e tij, është shprehur se Teatri Kombëtar është pasuri kombëtare dhe ndryshimi i pronësisë ka qenë i paligjshëm.
Deri më tani presidenti Meta i është drejtuar dy herë Gjykatës Kushtetuese, për të mos lejuar shembjen e godinës së Teatrit Kombëtar. Meta ka depozituar kërkesë për shfuqizimin e ligjit special për shembjen e godinës, ndërsa ka kërkuar edhe shqyrtimin për kalimin e pronësisë së Teatrit Kombëtar nga Ministria e Kulturës te Bashkia e Tiranës.
