Qytetarët shqiptarë do të paguajnë 21.3 milionë euro për shembjen e rrugës në Librazhd, një dëm që dyshohet se lidhet me ndërhyrjet e kompanive ndërtuese, por që në fund po mbulohet nga buxheti i shtetit. Autoriteti Rrugor Shqiptar ka shpallur një tender prej 2.04 miliardë lekësh për stabilizimin e segmentit që izoloi juglindjen e vendit për ditë me radhë.
Pavarësisht dyshimeve të forta për rolin e punimeve në aksin e ri nga kompania A.N.K, fatura nuk po u shkon atyre që dyshohet se e shkaktuan problemin. Ajo po u kalon qytetarëve.
Në deklaratat zyrtare, përgjegjësia u orientua fillimisht te natyra. Reshjet e shiut u paraqitën si shkaku kryesor i shembjes, një linjë që u mbajt nga zyrtarë të lartë të shtetit.
Por në të njëjtin segment, vetëm pak metra më sipër, kompania A.N.K kishte ndërtuar një mur gabioni, duke bllokuar një valvul natyrale të shkarkimit të ujërave. Kjo ndërhyrje dyshohet se rriti presionin mbi kodrën, duke çuar në rrëshqitjen e saj dhe në shkatërrimin e rrugës.
Ndërkohë që përgjegjësia mbetet pa adresuar, përfitimet vazhdojnë. Disa muaj më parë, e njëjta kompani përfitoi rreth 1 milionë euro nga buxheti i shtetit për ndërhyrje emergjente në Dragostunjë.
Tani, me një tjetër tender prej 21.3 milionë eurosh, qytetarët po paguajnë sërish për të njëjtin problem, ndërsa kompanitë që dyshohet se e krijuan atë mbeten jashtë faturës dhe brenda skemës së përfitimit nga fondet publike.
