Shembja e pallatit në rrugën “Myslym Keta” në Tiranë ka sjellë reagimin e liderëve politikë të vendit tonë, Sali Berishës dhe Ilir Metës. Berisha me anë të një postimi në “Facebook” është shprehur se shembja e pallatit dëshpëron njerëzit në prag të festave të fundvitit, kjo falë bandës Rama-Veliaj.
“Edi Rama dhe Erion Velia janë një bandë, që fitimi i ka çnjerëzuar gjerë në kockë! Duhej patjetër t’i dëshpëronin dhe mjeronin për festat e fundvitit 90 familje, 250 fëmijë, të moshuar, burra e gra. Akt i shëmtuar. Sb”, shkruan Berisha.
Në lidhje me shembjen e pallatit ka reaguar edhe kreu i Partisë së Lirisë, Ilir Meta që thekson se ky është një agresion i përsëritur.
“Shembja e pallatit në Rr. “Myslym Keta” është agresion i përsëritur në paligjshmëri të plotë dhe i egër ndaj qytetarëve të thjeshtë ashtu si tek Teatri Kombëtar, Astiri, Bregu i Lumit dhe 5 Maji.
Natën dhe me dhunën e Policisë së “Rilindjes” qytetarëve ju rrëmbehet dhe ju shkatërrohet prona që të majmen klientët e “Rilindjes”.
Fëmijë, të moshuar, burra dhe gra janë hedhur në rrugë të madhe, që të vazhdojë grabitja dhe plaçkitja e bandës së Erion Veliaj dhe oligarkëve përqark tij.
14 maji është dita e madhe kur qytetarët e Tiranes do t’ju japin ndëshkimin më të rreptë këtyre agresorëve dhe hajdutëve të shfrenuar”, shkruan Meta. /GAZETA REFORMA
