Sfida e shumëpritur, tifozët dardanë përcjellin me brohoritje Kosovën në ndeshjen përballë Maqedonisë së Veriut

Kombëtarja e Kosovës luan ditën e nesërme kundër Maqedonisë së Veriut në Shkup dhe objektivi kryesor është fitorja, për të shkuar më pas në finalen që të siguron një vend në EURO 2021.

Duke parë rëndësinë e ndeshjes së nesërme, tifozët nuk mund të rrinin pa mbështetur skuadrën e Kosovës, ndonëse nuk do lejohen në stadium.

Tifozë të shumtë janë grumbulluar në kufirin mes Kosovës dhe Maqedonisë së Veriut, për të pritur skuadrën e tyre të zemrës. Sapo këta të fundit kanë mbërritur, ata i kanë ndalur dhe kanë nisur të këndojnë në kor për t’i dhënë zemër skuadrës. Një moment shumë i veçantë ky, teksa edhe lojtarët kanë dalë nga autobusi për tu bashkuar me tifozët.

Sfida mes Kosovës dhe Maqedonisë së Veriut do të luhet nesër në “Tose Proeski” të Shkupit, pa praninë e tifozëve për shkak të pandemisë Covid-19, megjithatë fansat kanë mbështetur maksimalisht futbollistët dardanë në rrugën drejt kryeqytetit maqedonas.