I ftuar në emisionin “Now” me Erla Mëhillin, ish-ministri i Jashtëm Ditmir Bushati foli për procesin zgjedhor në Shqipëri, duke theksuar problemin e përdorimit të burimeve shtetërore gjatë fushatave elektorale.
Ai shprehu zhgënjimin që, edhe pas 12 vitesh, kjo praktikë vazhdon të jetë e pranishme dhe fajtorë janë të dyja palët politike.
Bushati vuri në dukje se ndërkohë që Bashkimi Evropian kërkon eliminimin e praktikave të investitorit strategjik në media, në Shqipëri tre media kombëtare mbeten nën kontrollin e këtij lloji investimi, duke u ushqyer direkt nga buxheti i shtetit.
“Duhet të vendosim nëse duam që informimi të jetë i kontrolluar nga disa duar që marrin fonde shtetërore, apo të kalojmë në modele ku media operon në mënyrë të pavarur dhe pa akses në financa kombëtare,” tha Bushati, duke theksuar nevojën për transparencë dhe cilësi në informim.
Nga ana tjetër, gazetari Armand Shkullaku, i ftuar në emisionin “Çim Peka Live” në Syri TV, komentoi situatën politike dhe mediatike, duke vënë në dukje se autoritarizmi i regjimit e përshpejton fundin e tij.
Ai përshkroi si mekanizma të propagandës levat që kryeministri Edi Rama përdor në media, të cilat punojnë në mënyrë efektive për të kontrolluar informacionin dhe për të mbrojtur interesat e pushtetit.
“Çdo regjim sa më autoritar dhe absolut që bëhet, aq më i afërt është fundi i tij. Por në këtë pushtet absolut, përveç servilizmit që rritet, lind edhe padobishmëria e atyre që e rrethojnë,” tha Shkullaku, duke iu referuar mënyrës se si mediat reagojnë ndaj çdo kritikë apo shkrimi kundër qeverisë.
