Nga oxhaku i Kapelës Sistine është ngritur mëngjesin e së enjtes tym i zi, një sinjal i qartë se Kolegji i Kardinalëve nuk ka arritur ende konsensusin e nevojshëm për të zgjedhur Papën e ri gjatë dy votimeve të para.
Tymnaja e zezë, simbol i mungesës së një vendimi, është parë nga mijëra njerëz të mbledhur në Sheshin e Shën Pjetrit në Vatikan, të cilët prisnin me padurim lajmin për zgjedhjen e pasardhësit të Papa Françeskut.
Papa ndërroi jetë më 21 prill, pas 12 vitesh në krye të Kishës Katolike, duke hapur rrugën për fillimin e konklavit.
Që nga e mërkura, kardinalët janë izoluar nga bota e jashtme, duke dorëzuar celularët dhe duke u shkëputur nga çdo kontakt i mundshëm, si pjesë e rregullave strikte që synojnë të garantojnë fshehtësinë e procesit të zgjedhjes.
Me 133 kardinalë votues, një kandidat duhet të marrë të paktën 89 vota për të shpallur fitoren.
Hapja solemne e konklavit, e shoqëruar me një procesion të klerikëve në Kapelën Sistine, u transmetua drejtpërdrejt përmes ekraneve të mëdha në sheshin përballë Bazilikës së Shën Pjetrit.
Procesi i votimit do të vijojë pasditen e sotme, ku sytë do të jenë sërish nga oxhaku, në pritje të tymit të bardhë, që do të sinjalizojë përzgjedhjen e Papës së ri.
Nëse do të ketë rezultat, ky pritet të shfaqet në orën 17:30 ose në orën 19:00. Tradicionalisht, është shumë e rrallë që zgjedhja të përmbyllet në ditën e parë të votimeve.
