Ditën e djeshme, pas një seance paraprake që zgjati tetë orë, ish-ministri i Shëndetësisë, Ilir Beqaj, u përball me trupën gjyqësore për të mbrojtur veten nga akuzat.
Në këtë seance avokati i tij mbrojtës paraqiti kërkesën për pushimin e çështjes, duke argumentuar se ish-ministri nuk ka lidhje me akuzat që përfshijnë një prej skandaleve më të përfolura në sektorin shëndetësor.
Gjykata vendosi të shtyjë procesin, duke caktuar datën 12 dhjetor për seancën e ardhshme, ku pritet të dëgjohen deklaratat e të bashkëakuzuarve, përfshirë Klodjan Rrjepajn.
Çështja ka të bëjë me një kontratë të dyshimtë për sterilizimin e pajisjeve mjekësore, e cila dyshohet se ka sjellë dëme të konsiderueshme financiare.
Ndërkohë, Beqaj, i cili ndodhet në burg për një tjetër rast të lidhur me fondet e SASPAC, po ndiqet në gjendje të lirë për këtë çështje.
Në dosjen e sterilizimit, e cila u dërgua për gjykim nga SPAK në mars 2024, përfshihen gjithsej tetë të akuzuar, mes të cilëve është dhe biznesmeni Ilir Rrapaj.
GJKKO mbetet në pritje të dëshmive shtesë për të vendosur mbi hapat e ardhshëm të procesit.
“DOSJA E STERILIZIMIT”
Sipas dosjes së Prokurorisë së Posaçme Kundër Korrupsionit dhe Krimit të Organizuar (SPAK), hetimet për çështjen e koncesionit të sterilizimit kanë nxjerrë në pah lidhjet mes biznesmenit Ilir Rrapaj dhe ish-ministrit të Shëndetësisë, Ilir Beqaj, si dhe zëvendësministrit të tij, Klodian Rjepaj. Dokumentet tregojnë se Rrapaj ka qenë pranë drejtuesve të lartë të Ministrisë së Shëndetësisë në disa aktivitete zyrtare para dhe pas nënshkrimit të kontratës kontroverse prej 100 milionë eurosh për sterilizimin e pajisjeve mjekësore, e cila iu dha kompanisë së tij “SaniService” në vitin 2015.
SPAK vë në dukje dy momente të rëndësishme që lidhen me këtë çështje. E para është pjesëmarrja e Rrapajt në aktivitetin e titulluar “Thuaji Po Shqipërisë”, organizuar më 27 nëntor 2013, ku ai shfaqet në praninë e ministrit Beqaj dhe zëvendësit të tij Rjepaj. Ky detaj u konfirmua nga postimet dhe fotografitë në faqen zyrtare të Ministrisë së Shëndetësisë.
Rrapaj u shfaq sërish në krah të drejtuesve të Ministrisë vetëm dy javë më vonë, më 18 dhjetor 2013, gjatë një takimi zyrtar në Universitetin e Peruxhias. Fotot e këtij aktiviteti, të publikuara në faqen e “Facebook”-ut të ministrisë, tregojnë biznesmenin duke marrë pjesë si pjesë e delegacionit të ministrisë, së bashku me Beqajn dhe Rjepajn.
Çështja e sterilizimit, që më vonë u denoncua nga “Nisma Thurje” në dhjetor 2019, përfundoi në duart e SPAK-ut dhe ka nxjerrë në dritë një zinxhir veprimesh që po shqyrtohen si pjesë e hetimeve për abuzime dhe korrupsion.
