Vazhdimi i seancës për konstituimin e legjislaturës së re të Kuvendit të Kosovës, të dalë nga zgjedhjet e 9 shkurtit, është caktuar për të enjten në orën 12:00.
Kjo datë shënon afatin përfundimtar 48-orësh nga ndërprerja e seancës së mëparshme të mbajtur të martën, e cila dështoi të kalonte pikën e parë të rendit të ditës.
Presidentja e Kosovës, Vjosa Osmani, ndërhyri me një letër drejtuar kryesuesit të seancës, Avni Dehari, duke i kujtuar se përmbushja e detyrës për funksionalizimin e institucioneve është një detyrim kushtetues.
“Kushtetuta, praktika gjyqësore dhe rregullorja e Kuvendit kërkojnë që seanca të vazhdojë brenda dy ditësh nga ndërprerja,” theksoi Osmani.
Dehari kishte kërkuar më herët sqarim institucional lidhur me mënyrën e veprimit pas dështimit të seancës, por përgjigjja e Presidencës ishte e prerë: formimi i institucioneve nuk mund të bllokohet.
Të martën, deputetët nuk arritën të miratonin raportin e Komisionit të përkohshëm për verifikimin e mandateve dhe kuorumit.
PDK, LDK dhe AAK votuan kundër, duke kundërshtuar pjesëmarrjen në seancë të anëtarëve të Qeverisë në detyrë që ishin zgjedhur si deputetë, pa dhënë më parë dorëheqjen formale nga postet ekzekutive.
Presidentja Osmani, përmes një deklarate në rrjete sociale, theksoi se deputetët kanë për detyrë të bëjnë funksionale institucionet, jo të pengojnë konstituimin e tyre.
Në të njëjtën linjë, kreu i LDK-së, Lumir Abdixhiku, e mirëpriti reagimin e saj, por nguli këmbë që ministrat e zgjedhur si deputetë duhet të dorëhiqen zyrtarisht.
Në anën tjetër, Albin Kurti, kryeministër në detyrë, reagoi duke e quajtur kërkesën për dorëheqje formale të ministrave “të pamatur” dhe me rrezik për krijimin e një vakumi institucional.
Lëvizja Vetëvendosje thekson se qeveria ka qenë në dorëheqje që nga përfundimi i mandatit në mars dhe akuzon opozitën përfshirë PDK-në, LDK në, AAK-në dhe Listën Serbe për krijimin e një krize të qëllimshme.
Miratimi i raportit të komisionit është parakusht për betimin e deputetëve dhe zgjedhjen e strukturës udhëheqëse të Kuvendit. Vetëm pas këtyre hapave mund të fillojë procesi për formimin e qeverisë së re.
Vetëvendosje, fituese e zgjedhjeve me rreth 42% të votave dhe 48 deputetë, është ende larg shumicës prej 61 votash të nevojshme për të formuar ekzekutivin.
Pas saj radhitet PDK me 24 mandate, LDK me 20 dhe koalicioni AAK-NISMA me përfaqësues të tjerë. Deri tani, vetëm Fatmir Limaj nga NISMA nuk ka vendosur “vija të kuqe” për një koalicion të mundshëm me LVV-në, duke lënë hapësirë për negociata të reja politike.
Seanca e së enjtes pritet të jetë vendimtare për të kuptuar nëse Kuvendi do të arrijë të çbllokohet, apo do të thellohet më tej kriza institucionale në vend.
