Sazani pronë publike edhe për pak kohë, rrëzohet propaganda e Ramës

Kryeministri Edi Rama ka publikuar mëngjesin e kësaj të marte pamje nga një plazh i ishullit të Sazanit, duke treguar fluksin e madh të turistëve që kanë mbërritur në Shqipëri këtë sezon. Në postimin e tij, Rama thekson se vendi po përjeton një sezon të jashtëzakonshëm prurjesh turistike, me vizitorë vendas dhe të huaj që po eksplorojnë të gjithë hartën e vendit.

“Mirëmëngjes dhe me një tjetër plazh të ‘sulmuar’ nga turistët vendas e të huaj, në ishullin e Sazanit, në një sezon të jashtëzakonshëm prurjesh në Shqipëri, po edhe shpërndarjeje të turistëve në të gjithë hartën e vendit, ju uroj një ditë të mbarë,” shkruan Rama në rrjetet sociale.

Por, pas këtij sezoni të suksesshëm turistik, fshihet një projekt i madh privatizimi që pritet të ngjallë debate të shumta. Kryeministri Rama po planifikon t’i japë një pjesë të ishullit të Sazanit Jared Kushner, dhëndrit të ish-presidentit amerikan Donald Trump, për të ndërtuar një resort super luksoz.

Flitet që ky i fundit financohet nga princi saudit Mohammed bin Salman. Ky transaksion do të lejojë oligarkët vendas të përfitojnë nga ndërtimi dhe zhvillimi i mëtejshëm i resortit, ndërsa Rama krahas përfitimeve ekonomike përmes oligarkëve synon të sigurojë mbështetjen politike të Trump, i cili pritet të jetë kandidati fitues në zgjedhjet presidenciale amerikane.

Kritikët e këtij plani theksojnë se privatizimi i plazheve publike të Shqipërisë do të krijojë precedent të rrezikshëm për menaxhimin e pronësisë publike. Ata gjithashtu ngrenë pyetje për ndikimin e investitorëve të huaj në politikën dhe ekonominë shqiptare.

Kryeministri Rama dhe qeveria e tij ende nuk kanë bërë deklarata zyrtare në lidhje me këtë projekt, por mbetet për t’u parë se si do të zhvillohen ngjarjet dhe cilat do të jenë reagimet e publikut dhe të opozitës politike në Shqipëri.

Projekti për Sazanin