Një vatër zjarri me përmasa të mëdha është aktivizuar pasditen e sotme në zonat periferike të Sarandës, duke përfshirë fshatin Çukë dhe zonën malore të Metoqit.
Flakët janë përhapur me shpejtësi, të favorizuara nga erërat e forta dhe terreni i vështirë, duke krijuar një situatë shqetësuese për autoritetet dhe banorët.
Sipas informacioneve paraprake, zjarri ka nisur në Lëkurës dhe më pas është përhapur në drejtim të Çukës dhe Metoqit.
Forcat zjarrfikëse dhe ato policore janë të pranishme në terren, duke punuar intensivisht për izolimin e flakëve dhe për të parandaluar afrimin e tyre drejt zonave të banuara.
Në operacion është përfshirë edhe një helikopter, i cili po kryen ndërhyrje nga ajri për të ndihmuar në kontrollin e situatës.
Deri më tani nuk raportohet për dëme në banesa, ndërkohë që vijojnë hetimet për të përcaktuar shkaqet e rënies së zjarrit. Autoritetet mbeten në gatishmëri për çdo zhvillim të mëtejshëm.
