Rusia ka kthyer edhe 1.200 trupa të pajetë që pretendohet se janë qytetarë ukrainas të vrarë gjatë luftës, njoftuan autoritetet në Kiev të dielën.
Sipas Shtabit Koordinues për Trajtimin e të Burgosurve të Luftës, trupat e sjella nga pala ruse përfshijnë edhe ushtarë të forcave ukrainase. Autoritetet në Ukrainë po punojnë për identifikimin e tyre.
Kjo e çon në 4.012 numrin total të trupave të kthyer nga Rusia në Ukrainë që nga fillimi i konfliktit.
Në të kundërt, Rusia ka njoftuar se ka marrë deri më tani vetëm 27 trupa të ushtarëve të saj nga pala ukrainase.
Ndërkohë, burime nga mediat shtetërore ruse thanë se gjatë këmbimit të fundit më 15 qershor, Moska nuk ka pranuar asnjë trup të ri.
Riatdhesimet janë pjesë e një marrëveshjeje të arritur pas dy raundesh bisedimesh të drejtpërdrejta mes palëve në Stamboll, të mbajtura më 16 maj dhe 2 qershor.
Këto takime sollën disa rezultate në këmbimet humanitare, si kthimi i trupave dhe i të burgosurve por nuk prodhuan përparim real drejt një armëpushimi apo fundi të armiqësive.
Ndërkohë, lufta në terren mbetet intensive. Ministria ruse e Mbrojtjes deklaroi se forcat e saj kanë marrë nën kontroll fshatin Malinivka në rajonin e Donjeckut, një zonë ku po zhvillohen përplasjet më të ashpra aktualisht.
Rusia pretendoi gjithashtu se ka shkatërruar me një sulm raketor një rafineri në qytetin Kremençuk, që sipas saj furnizonte me karburant forcat ukrainase në frontin lindor, megjithatë këto pretendime nuk mund të verifikohen në mënyrë të pavarur.
Po sipas Moskës, mbrojtja ajrore ruse ka rrëzuar 128 dronë ukrainas dhe dy raketa të drejtuara gjatë 24 orëve të fundit, një bilanc që ilustron intensitetin e përballjeve ushtarake, 40 muaj pas nisjes së pushtimit të plotë të Ukrainës nga Rusia, më 24 shkurt 2022.
Edhe pse kanë ndodhur disa këmbime të trupave dhe të burgosurve, lufta vijon me të njëjtin intensitet, ndërsa çdo përpjekje për negociata të qëndrueshme ka dështuar deri më tani.
