Një anëtar i Komisionit të Vlerësimit të Ofertave ka ngritur dyshime të forta për tenderin 9.5 milionë euro të Radiotelevizionit Shqiptar, për mirëmbajtjen e rrjetit të shpërndarjes DVB-T2 për katër vitet e ardhshme.
Në shkresën konfidenciale të publikuar nga “Kapitali”, një nga pesë anëtarët e KVO-së, i caktuar nga vetë RTSH, denoncon se vlera e tenderit të fituar nga “Idea-Tel”, kompania e biznesmenit Idlir Karkini, në bashkim me “Real Com”, është fryrë me rreth 60 për qind krahasuar me çmimin që i njëjti shërbim ka kushtuar në katër vitet e mëparshme.
“I njëjti operator (Idea-Tel) ka kryer me nënkontraktim shërbimin për periudhën 2021-2025 me një çmim prej 5.6 milionë euro pa tvsh. Ndërkohë që për të njëjtin shërbim (e njëjta periudhë dhe objekt pune) ka ofruar 9 milionë euro ose 61 për qind më shumë” thuhet në opinionin denoncues që anëtari i KVO-së i ka bashkëngjitur vlerësimit të fituesit.
Rrjeti DVB-T2 i Radiotelevizionit Shqiptar u ndërtua nga kompania gjermane “Rode & Shwarz” dhe kushtoi 20 milionë euro. Për katër vitet e kaluara, mirëmbajtja iu nënkontraktua “Idea-Tel” për 5.6 milionë euro.
Por tani, kur i njëjti shërbim është prokuruar nga RTSH me tender publik, çmimi është rritur ndjeshëm. Vlera fituese e tenderit nga bashkimi i operatorëve “Idea-Tel” dhe “Real Com” është 899.3 milionë lekë, që me kursin aktual shkon rreth 9.4 milionë euro.
Pra, bëhet fjalë për gati 4 milionë euro më shumë se vlera me të cilën “Idea-Tel” e kreu këtë shërbim në katër vitet e shkuara, si nënkontraktore e kompanisë që ndërtoi të gjithë sistemin.
Sipas shkresës, dyshimet nuk lidhen vetëm me çmimin. Anëtari i KVO-së ngre shqetësimin se tenderi ka qenë thuajse pa garë reale, pasi nga tre ofertat e paraqitura, njëra nuk kishte asnjë dokument, ndërsa oferta e dytë kishte mangësi në autorizimin e prodhuesit.
“Praktikisht numri i ofertave të vlefshme është reduktuar në një duke eliminuar konkurrencën reale. Oferta e fituese e Idea-Tel dhe Real Com është thuajse në nivelin e fondit limit, pa reflektuar ulje të çmimit, çka tregon mungesë të presionit konkurrues,” vijon opinioni i vlerësimit.
Fondi limit i tenderit ishte 906 milionë lekë. “Idea-Tel” dhe “Real Com” u shpallën fituese me 899.3 milionë lekë, ose 99.3 për qind të fondit limit. Në një tender prej 9.5 milionë eurosh, RTSH kurseu vetëm rreth 70 mijë euro.
Në opinionin kundërshtues ngrihen dyshime edhe për kriteret teknike të kompanive fituese.
“Tek Idea-Tel dhe Real Com mungojnë diplomat e universitetit për katër inxhinierë dhe kontratat e punës për të gjithë stafin e deklaruar. Gjithashtu në bazë të informacionit në dosje nuk mund të provohet nëse stafi inxhinierik i të dy kompanive ka eksperiencë të punës në lidhje me sistemet DVB-T2,” thuhet në shkresë.
Pavarësisht kundërshtimeve të një prej anëtarëve të KVO-së, Drejtoria e Përgjithshme e RTSH shpalli fitues bashkimin e kompanive “Idea-Tel” dhe “Real Com”, në një procedurë që sipas denoncimit rezulton pa konkurrencë reale dhe me vlerë të fryrë gati dyfish.
