Para disa javësh, kryeministri i vendit, Edi Rama dha lajmin që pagat në vendin tonë do të pësonin rritje, madje ajo mesatare shumë shpejt do të jetë 900 euro. Ndërkohë që ditën e sotme, drejtuesi i koalicionit “Bashkë Fitojmë”, Sali Berisha ka akuzuar kryeministrin Edi Rama se po vjedh qytetarët edhe pse u ka premtur ritje rrogash. Në prezantimin e kandidatit të Dropullit, Thanas Maneka ai është shprehur se Rama rriti rrogat, por ka rritur edhe çmimet. Berisha theksoi ndër të tjera se kryeministri i cili u premtoi qytetarëve rrogën e 13-të i mori atyre edhe të 12-tën.
“Pse shtrëngohet dara e varfërisë rreth shqiptarëve, sepse i ngriu rrogat për 10 vite. Rrogat u ngrinë miqtë e mi, por çmimet nuk u ngrinë. Çmimet u ngritën, u ngritën dhe vetëm me rritjen e çmimeve nga viti 2021-2022, secili nga ju ka shpenzuar për ushqime 430 mijë lekë më shumë. Pra ka shpenzuar dy pensione më shumë, një rrogë më shumë. Njeriu që premtoi rrogën e 13, ua mori edhe rrogën e 12-të. Njeriu që premtoi, dy gjëra tha do ju bëj unë dhe më bëni përgjegjës personal, legalizimet dhe ujin e pijshëm. Absolutisht e gjeta Tepelenën aty ku e lashë. Legalizimet i ka shndërruar në sistemin më të tmerrshëm të ryshfetit”, u shpreh ai.
