Një nga elementët më të rëndësishëm të turizmit veror në Durrës ka qenë fluksi i pushuesve nga Kosova. Afërsia gjeografike dhe çmimet e përballueshme e kanë mbajtur këtë qytet ndër destinacionet e para të zgjedhura prej tyre.
Këtë verë, megjithatë, disa pushues vërejnë një rënie të numrit të vizitorëve kosovarë.
“Nga Ferizaj i Kosovës, vij që 9 vite. Ta shoh si do kaloj sivjet, se pritja nuk është e mirë. Nuk na presin mirë. Ma shtrenjt se vitet tjera,” shprehet një prej tyre.
“Më pak ka pas vizitor se vjet, për shkak të çështjes ekonomike ndoshta,” thotë një tjetër.
Një tjetër pushues shton: “Po mirë është, super është, normal është vend turistik. Çdo vit po pakohen nga pak, qysh po shikoni që s’jam gabim. Po ndoshta arsyeja, çmimet, euro. I bjen më shtrenjt për arsye që kur thyejmë euron, çmimi është më i shtrenjtë.”
Megjithatë, për shumë të tjerë, Durrësi mbetet ende një zgjedhje e qëndrueshme dhe konkurruese krahasuar me destinacionet e tjera.
“Prej Drenice, vij për çdo vit. Çmimet qysh janë, çdo kund më mirë krahasu me vende tjera. Mas dy jave ndoshta vij prapë, rri 2-3 ditë,” thotë një tjetër pushues.
“Me përshtypjet më të lira largohem. Klima mirë, deti mirë, çmime të volitshme, të përballueshme. Edhe besoj që vitin e ardhshëm kemi me vizitu Durrësin,” shton një tjetër.
“Prej Kosove vij, mirë shumë. Çmimet në rregull janë krejt, që 6 vite vij,” thotë një pushues tjetër.
Edhe pse fluksi i vizitorëve nga Kosova mund të ketë ndryshuar, Durrësi mbetet një pikë e rëndësishme në hartën e tyre turistike.
Për të ruajtur këtë pozicion, plazhi më i madh i vendit duhet të mbajë çmime konkurruese dhe të ofrojë shërbim cilësor, në mënyrë që të mos humbasë një ndër grupet më besnike të pushuesve.
