Qytetarët e prekur nga tërmeti po denoncojnë çdo ditë e më shumë rritjen e qirave të apartamenteve.
Lidhur me këtë çështje ka reaguar edhe eksperti i ekonomisë Enriko Ceko.
Sipas tij, rritja e çmimeve nuk është e justifikuar për shkak të kërkesë-ofertës, por vjen si pasojë e mungesës së solidaritetit në kushtet e fatkeqësisë natyrore.
“Teorikisht nuk duhet të ndodhte sepse ne kemi një largim shumë të madh të popullsisë. Fakti që janë 2500 apartamente të pa shitura në qytetet kryesore të vendit, kryesisht në Tiranë, tregon se nuk ka kërkesë për banesa.”- tha ai në një intervistë për RTV ORA.
Ceko, i bëri thirrje shtetit të gjejë mekanizma për të ndërhyrë në tregun informal të qirasë.
“Patjetër që mund të vihet një tavan dhe tavani duhet të vihet për metër katrorë. Të mos i japë para në dorë personave por t’ja gjejë shteti banesën te këta persona që japin banesën me qira dhe shteti ta paguajë.”
Sipas tij praktika të tilla janë përdorur dhe në vende si Argjentina apo Kili, ndërsa u kujtoi autoriteteve se ekziston një manual për përballimin e emergjencave nga Organizata e Kombeve të bashkuara që duhet nxjerrë nga sirtarët për tu implementuar në terren.
