Në GJKKO u zhvillua sot seanca për kopshtarin e kompleksit “Golden”, i akuzuar për përfshirje në rrëmbimin dhe zhdukjen e Jan Prengës në Kamëz në janar të vitit 2020.
Ky rigjykim ka nisur pas vendimit të Gjykatës së Lartë, e cila rrëzoi dënimin e përjetshëm dhe urdhëroi hapjen e procesit.
Gjatë seancës, prokurorja e çështjes, Elida Kaçkini, kërkoi shtyrjen e gjykimit dhe paraqiti një kërkesë për pranimin e provave shtesë të siguruara përmes letërporosive nga autoritetet franceze.
Këto prova përfshijnë komunikimet e koduara në aplikacionin SKY ECC mes të pandehurve kryesorë, përfshirë Dritan Rexhepin, Altin Hajrin dhe Gentjan Funiqin.
Sipas prokurorisë, këto komunikime janë të lidhura drejtpërdrejt me rrëmbimin dhe vdekjen e Jan Prengës, dhe janë marrë sipas procedurave ligjore ndërkombëtare.
Prokurorja Kaçkini theksoi se komunikimet e SKY ECC, të cilat përfshijnë Dritan Rexhepin, Gentjan Funiqin dhe Altin Hajrin, janë të rëndësishme për procesin dhe kanë ardhur nga autoritetet franceze në përputhje me kërkesat ndërkombëtare.
Ajo sqaroi gjithashtu se janë marrë provat e identifikimit të PIN-it të Dritan Rexhepit dhe të tjerëve, të cilat lidhen me ngjarjen për të cilën akuzohet Festim Bexhili.
Avokati i të pandehurit, Ilir Murati, kundërshtoi pranimin e këtyre provave të reja në këtë fazë të procesit dhe kërkoi që prokuroria të informojë nëse do të ketë prova të tjera në seancën e ardhshme.
Pas diskutimeve, gjykata pranoi kërkesën e mbrojtjes për njohjen me aktet e reja të paraqitura nga prokuroria dhe caktoi seancën e radhës për datën 13 maj, në orën 09:00.
Jan Prenga u rrëmbye në 17 janar 2020. Urdhri për rrëmbimin dhe vrasjen e 49-vjeçarit Jan Prenga dyshohet se ka ardhur nga një burg në Ekuador, ku vuante dënimin shqiptari Dritan Rexhepi.
