Siç ndodh gjithmonë, kështu pritet edhe këtë herë. Kush është afër pushtetarëve dhe qeverisë, pret t’ia hedhi paq edhe në sistemin e drejtësisë, madje edhe kur është kapur i zhytur kokë e këmbë.
Rasti më i fundit që pret të shpëtojë pa u përballur me ligjin është Valdrin Pjetri. Prokuroria e Tiranës ka vendosur të çojë për pushim çështjen ndaj ish kandidatit të PS për kryetar bashkie në Shkodër, në zgjedhjet e 30 qershorit 2019.
Është BIRN që raporton se prokurori i çështjes, Ervin Karanxha, e bazon në vendimin e Gjykatës së Firences, Itali të vitit 2003, kur Pjetri është akuzuar dhe dënuar me 18 muaj burgim dhe 1000 euro gjobë për ‘mbajtje të lëndës narkotike’ në bashkëpunim. Në kërkesën për pushim të prokurorisë, thuhet se Gjykata e Fierences kishte vendosur pezullimin e dënimit dhe mospërmendjen e tij në të ardhmen.
‘Vetë vendimi i dënimit të tij në pjesën e dispozitivit të tij deklaronte që ky vendim nuk duhej të përmendej në të ardhmen ose të bëhej publik’, citohet në kërkesën për pushimin e çështjes.
Karanxha vlerëson se, kur gjykata ka urdhëruar që vendimi nuk duhet të përmendet, atëherë ky vendim dyhet zbatuar. ‘Sipas interpretimit të nenit 3 dhe 11 të Kodit të Procedurës Penale del se vendimi i gjykatës zbatohet dhe nuk diskutohet’, citohet në kërkesën për pushim. Sipas prokurorisë, Pjetri ka zbatuar një vendim të formës së prerë të Gjykatës së Fierences duke mos e deklaruar dënimin e dhënë ndaj tij për posedim të lëndës narkotike të llojit cannabis sattiva.
Më tej, prokuroria argumenton, se duke qenë se vepra penale ka ndodhur në shtetin fqinj, në rastin konkret zbatohet ligji penal Italian dhe jo ai shqiptar. Bazuar në këto arsyetime, prokuroria arrin në përfundimin se Pjetri nuk duhej ta deklaronte dënimin e tij dhe se për këtë shkak nuk ka konsumuar elementët e veprës penale të parashikuar nga neni 190 i Kodit Penal ‘falsifikimi i vulave, i stampave ose i formularëve’.
Kërkesa për pushim do të vlerësohet nga Gjykata e Tiranës e cila do të vendosi nëse është I drejtë ose jo konkluzioni i prokurorisë.
Prokuroria nisi procedimin penal për Pjetrin në 17 dhjetor 2019, ndërkohë që ky i fundit ishte zgjedhur kryetar i Bashkisë së Kodrës, në zgjedhjet e 2019, por nuk e mori detyrën pas denoncimeve publike se ishte i dënuar në itali për çështjen e drogës.
/Burimi: BIRN/Përshtati: GazetaReforma.com/