Kreu i Partisë Demokratike, Lulzim Basha në kronikën e përditshme “100 dështimet e Ramës”, ka publikuar rastin Becchetti. Sipas Bashës ky është një tjetër dështim i madh i kryeministrit Rama në 8 vite qeverisje.
Duke iu referuar vendimit të një dite më pare ku biznesmeni Becchetti fitoi gjyqin, kryedemokrati Basha, shkruan se lufta personale e Edi Ramës do t’iu kushtojë shqipëtarëve 110 mln euro, pra afërsisht 4560 lekë cdo shqiptari.
“21 ditë deri më 25 prill. 100 dështimet e Ramës në 8 vite. Sa do t’u kushtojë shqiptarëve lufta personale e Edi Ramës me sipërmarrësin italian Francesco Becchetti? Përgjigjja: 110 milionë euro për shkak të papërgjegjshmërisë së Edi Ramës, çdo shqiptar do të paguajë 4.560 lekë për mbylljen e televizionit ‘Agon’”, shkruan Basha.
Kujtojmë se ditën e djeshme Shqipëria humbi përfundimisht gjyqin me sipërmarrësin italian Francesco Becchetti, lidhur me dëmshpërblimin e kërkuar nga ai për mbylljen e televizionit “Agon” në vitin 2015. Qendra Ndërkombëtare për Zgjidhjen e Mosmarrëveshjeve të Investimeve (ICSID) një gjykatë arbitrazhi, pjesë e Bankës Botërore, e dënoi Shqipërinë në Prill të vitit 2019 me 110 milion euro, duke gjykuar se mbyllja e televizionit ishte “motivuar politikisht”. Ky dënim përfaqëson dhe vlerën më të lartë me të cilën Shqipëria është dënuar nga një gjykatë arbitrazhi.Autoritetet shqiptare reaguan duke kërkuar anullimin e vendimit të marrë. Në Gusht të vitit 2019 ICSID pranoi ankimimin duke urdhëruar pezullimin e përkohshëm të ekzekutimit të vendimit të saj.
