Së fundmi, mjeku infeksionist, Pëllumb Pipero, ka dhënë një intervistë në studion e lajmeve në TemA TV, ku është shprehur se është ende herët për të bërë një parashikim të saktë të ecurisë së COVID-19 në Shqipëri.
Ndonëse numri i të infektuarve dhe viktimave është relativisht i ulët, sipas mjekut nuk ka vend për optimizëm, pasi përhapja e virusit është ende në fillimet e saj.
Më tej Pipero tha se piku i të infektuarve pritet të arrihet diku nga fundi i javës së tretë ose fillimi i javës së katërt.
“Jemi ende në fillim. Është java e parë, është herët për një parashikim të saktë. Nuk besoj se ka vend për optimizëm. Është një ecuri normale brenda anormalitetit. Përvoja e vendeve të tjera ka dëshmuar se në javët e para, numri është i vogël, pastaj nga fundi i javës së tretë dhe fillimi i javës së katërt vjen piku. Është e vështirë të bëjmë parashikime. Ne jemi në situatë qetësie të rreme të epidemisë. Askush nuk mund të parashikojë shifrat. Kjo duket një heshtje që nuk do të zgjasë shumë. Fundi i javës së tretë dhe fillimi i javës së katërt do të jetë ai bumi tipik i epidemive”, tha ai.
Deri tani nuk ka ende një vaksinë që ta luftojë virusin, kështu Pipero tha se për frenimin e përhapjes së epidemisë është i domosdoshëm zbatimi i masave kufizuese që janë marrë deri tani.
“Epidemia ka sjellje të ndryshme. Aty ku është gabuar më shumë, ka pasur më shuëm raste. Le të marrim Italinë, ku qytetarët nuk zbatuan rregullat dhe mjekët nuk konsideruan personat me simptoma të ngjashme me gripin. Atje ku është gabuar, kostoja ka qenë e madhe, atje ku qytetarët nuk kanë qenë bashkëpunues, kostoja ka qenë akoma më e madhe”.
Po ashtu, mjeku foli edhe për kapacitetet që Shqipëria ka për përballimin e kësaj situate, duke u shprehur se asnjë sistem shëndetësor nuk ka kapacitete për situata të tillë, por në vendin tonë janë marrë masa dhe po merren të tjera për t’u përballur me një situatë të tillë.
“Ne kemi pasur para fillimit të epidemisë 5 respiratorë, tani kemi 35. Qeveria po merr masat maksimale që kapacitetet të jenë optimale”, tha ai.
Gjurmimi i kontakteve të të prekurve me i rëndësishëm se testimi.
“Ka udhëzime të OBSH që duhen respektuar. Unë si specialist i shp ne nuk duhet të bëjmë despistim. Kjo nuk na vlen. Ne duhet të gjurmojmë rastet e kontakttit. Këtu duhet kërkuar i sëmuri për t’u izoluar, sepse ndërpresim zinxhirin epidemiologjik. Në dijeninë time ka teste. Por nuk ka vlerë. Duhet të ndërpesim zinxhirin epidemiologjik”, tha ai.
Virusi që lindi në Kinë në fund të 2019, ka shkaktuar deri tani rreth 10, 000 viktima dhe ka infektuar mbi 241,000 persona në 177 shtete.
OBSH ka shpallur pandeminë, teksa epiqendra e virusit tashmë është zhvendosur në Europë, në një kohë kur Kina po rimerr veten dita-ditës dhe madje po ndihmon shtetet e tjera të prekura.
Qeveria shqiptare ka ndërmarrë një sërë masash për të parandaluar përhapjen e Coronavirusit, teksa është kufizuar qarkullimi i makinave dhe i këmbësorëve.
Gjithashtu ka nisur aplikimi i gjobave për ata që nuk respektojnë rregullat e vetëkarantinimit, kompanitë që nuk marrin masat ndaj Coronavirusit dhe tregtarët që rrisin çmimet në mënyrë abuzive.
