GRECO, struktura antikorrupsion e Këshillit të Europës kritikon vettingun në Policinë e Shtetit duke evidentuar rrezikun që ky proces të largojë nga detyra drejtues të kualifikuar. Grupi i shteteve kundër korrupsionit i Këshillit të Evropës rekomandon që në vend të vettingut të aplikohet vlerësimi periodik i drejtuesve dhe efektivëve gjatë qëndrimit të tyre në detyrë.
Avokati Fran Rica, ish- drejtues i disa dikastereve në policinë e shtetit, shprehet në një intervistë televizive, se ky ligj ka mangësi dhe është bërë me nxitim.
“Unë e studiova raportin,të gjitha gjetjet mendoj se janë të drejta. Problematika e këtij ligji, duhet parë në dy aspekte. Në problematikat që ka vetë ligji dhe si është zbatuar ligji. Sot nuk ka një afat kur do të përfundojë ndërkohë që u konceptua si një Vetting që do bëhej si vlerësim kalimtar i punonjësve të policisë që do ishte për 12 muaj. Kjo bie ndesh dhe me përmbajtjen e ligjit. Ka mangësi është bërë pak me nxitim”, tha Rica.
Vettingu në Policinë e Shtetit cilësohet si një proces i padobishëm nga strukturat e Këshillit të Europës.
Raporti rekomandon që procesi i filtrimit të zyrtarëve të policisë të zëvendësohet me kontrolle periodike të integritetit gjatë kohës që ushtrojnë detyrën.
Deri më tani janë përjashtuar nga policia e shtetit 4 drejtues, mes të cilëve Arben Frashëri dhe Besim Shabani, vendimet e të cilëve janë kontestuar për shkak të kualifikimeve dhe përvojës së punës që ushtronin prej më shumë se 20 vitesh.
GRECO propozon të ndryshohet praktika e emërimit të drejtuesve të nivelit të mesëm, sipas të cilëve të kryhet nga Drejtoria e Përgjithshme e Policisë së Shtetit dhe jo nga Ministria e Brendshme.
Shqipëria ka kohë deri në prill 2022 për t’i adresuar këto rekomandime.
Në kuadër të vettingut në polici janë konfirmuar në detyrë 22 drejtues të tjerë policie, 4 kanë dhënë dorëheqjen dhe 4 të tjerë janë përjashtuar.
