Kryeministri Edi Rama ditën e nesërme (e hënë) do të udhëtojë drejt Franës, ku do të takojë edhe Presidentin Francez, Emmanuel Macron. Ka qenë faqja zyrtare e Presidencës Franceze ajo që e ka bërë të ditur lajmin për vizitën e Ramës në Paris dhe takimin me kreun e shtetit francez. Në një njoftim thuhet se takimi mes kryeministrit Rama dhe presidentit të Francës do të mbahetnë orën 13:00.
Axhenda e ditës së hënë e Presidentit Emmanuel Macron e ka të rezervuar orën 13:00 për kryeministrin Rama. Mësohet se pas takimit liderët e dy vendeve pritet të drekojnë së bashku në pallatin Elysee. Nuk dihet ende se cilat janë arsyet për të cilat do të takohen Rama dhe Macron, por ashtu ende nuk është bërë e ditur se cila do të jetë tema e diskutimit mes tyre. Ndër të tjera nuk dihet gjithahstu nëse takimi është zyrtar a jo, pasi në faqen zyrtare të Presidencës Franceze është njoftuar vetëm dreka.
Ndërkohë, nuk ka pasur asnjë njoftim nga ana e Kryeministrisë në lidhje me këtë udhëtim të Ramës në Paris. Kujtojmë që hera e fundit që Rama ka qenë një një vizitë në Francë ku është takuar me presidentin Macron, ka qenë në 15 maj të vitit 2018.
