Zëvendës ministrja e Shëndetësisë, njëkohësisht kryetarja e Komitetit Teknik, Mira Rakacolli ka folur në Abc News në lidhje me masat e pandemisë dhe vendimin për të lejuar tubimet. Ajo ka thënë se vendimi I Gjykatës Kushtetuese është detyrim dhe se Komiteti do të shprehet gjithmonë për afatin sipas numrit të personave që mund të grumbullohen në këto kushte.
“Përderisa është vendimi i Gjykatës Kushtetuese patjetër që është detyrim zbatues. Ne do të shprehemi gjithmonë për afatin në lidhjen me numrin e personave që mund të grumbullohen sipas situatës epidemiologjike në vend” ka thënë Rakacolli.
Më tej ajo shtoi se në rast se situat epidemiologjike do të vazhdojë e njëjtë, numri i personave pkesëmarrës në një aktivitet nuk duhet të zgjerohet, pavarësisht se çfarë aktiviteti është.
“Në rast se situata epidemiologjike është kjo që është sot, indikatorët tregojnë që nuk duhet në asnjë mënyrë që të zgjerohet numri i personave që marrin pjesë në një aktivitet së bashku, të çfarëdo lloji qoftë ky aktivitet. Kjo nuk ka të bëjë me tematikën e aktivitetit, por ka të bëjë me ruajtjen e shëndetit”, tha zv/ministrja.
Rakacolli ka folur gjithashtu për procesin e votimit duke thënë se është e mundur të merren gjithë masat që mos të ketë infektime.
“Gjatë procesit të votimit, është e mundur që të merren të gjitha masat, që parashikon ato rregullat e shëndetit publik që të mos ketë mundësira infeksioni. Pra, ambientet, numri i njerëzve që do të jenë brenda në një hapësirë të bollshme për atë numër njerëzish që do të jenë aty, vendosja e rregullit të qytetarit që do të votojë, është e menduar mirë dhe është e mundur deri në detaj, dhe është krejtësisht e mundshme që njerëzit të gjithë ata që dëshirojnë dhe është mirë, që të gjithë e kemi detyrë qytetare që të marrim pjesë në votime, të mos riskohen nga ky proces, të mos riskohen më tepër se sa riskojnë në jetën e përditshme”, deklaroi Rakacolli.
