Në Qendrën Spitalore Universitare “Nënë Tereza”, qytetarët vazhdojnë të përballen me mungesë të theksuar të ilaçeve dhe aparaturave mjekësore jetike. “Nuk ka ilaç për kimion! Njerëzit këtu vdesin! Të paguash në këtë spital ku njerëzit janë duke dhënë shpirt?! Ky është krim! Është jeta ime në dorë dhe mua më mungon ilaçi kryesor,” shprehen qytetarët, të dëshpëruar nga situata.
Në vend që të jepte një përgjigje konkrete për këto probleme të rënda, kryeministri Edi Rama zhvilloi një tjetër shfaqje propagandistike në ambientet e QSUT-së. Pas 12 vitesh në pushtet, me skandalet në shëndetësi që vetëm thellohen dhe me denoncimet e përditshme për mungesën e barnave, Rama prezantoi në kulmin e fushatës elektorale një marrëveshje partneriteti me Qendrën Spitalore Universitare “San Raffaele”, të cilën e cilësoi si “shkop magjik” për transformimin e QSUT-së.
Ndërkohë që qytetarët vuajnë për trajtime bazë, kryeministri mori edhe mjekët dhe infermierët në këtë aktivitet propagandistik, duke i detyruar të lënë detyrën dhe pacientët për të marrë pjesë në aktivitetin e organizuar gjatë orarit të punës. Në një kohë kur pacientët luftojnë për jetën, mungesa e ilaçeve dhe pajisjeve mjekësore mbetet një problem i pazgjidhur.
