Kryeministri Edi Rama reagoi sot mbi akuzat lidhur me Samitin e tretë të ‘Mini-Shengenit Ballkanik’.
Ai deklaroi se kur Kosova të ulet në tavolinë do kuptohet nëse ai ka pasur të drejtë apo jo.
Mirëpo, në këtë postim kanë vërshuar shumë komente nga njerëzit, të cilët vijojnë ta akuzojnë atë.
Rama ka replikuar me disa prej tyre.
Njëri nga komentuesit i shkruan se Rama nuk po kupton lojën e Serbisë.
Ai shton se këtu bëhet fjalë për një shtet të tërë me Vuçiça, që nga Akademia e Shkencave Serbe e deri tek një pijetore e thjeshtë , duke thënë më tej se serbët duan zhdukjen tonë.
Kryeministri i është përgjigjur komentuesit, duke këmbëngulur edhe një herë, që t’ia lënë kohës ta vërtetojë.
“Ti’a lëmë kohës të na provojë se kush ka të drejtë dhe ndërkohë të respektojmë njëri-tjetrin, që nesër kush shan e mallkon sot, të mos ndjehet fajtor dhe qesharak”.
Një komentuese tjetër e pyet se si mund të ulet në një tavolinë me një person, i cili ka qenë nën urdhërat e Millosheviçit apo që nuk pranon masakrën e Raçakut.
Ndërsa përgjigja e Ramës është “Deri dje Kosova kërkonte të ulej në tavolinë dhe nuk e pranonin ata. Sot ikën Kosova nga tavolina ndërkohë që paqja bëhet me hasmin e me fqinjin”.
Një komentues nga Kosova e pyet se përse nuk priti edhe pak sa ata të zgjedhnin një përfaqësuse të denjë për t’i përfaqësuar në tryezë.
Kurse Rama thotë se Vuçiç ka qenë disa herë në tryezë edhe me liderët e Kosovës dhe kjo herë nuk është se solli ndonjë ndodhi të veçantë.
Ndërsa një komentuesi tjetër ,që ka përdorur një gjuhë më të ashpër, kreu i PS i ka kërkuar të heq dorë nga gjuha e vrazhdtë.
