Pas 5 orësh mbledhje në Këshillin Politik, kryeministri Edi Rama ka folur për mediat për atë që u diskutua gjatë mbledhjes. Rama tha se diskutimi ishte i gjatë interesant dhe do të vijojë sërish nesër dhe pse opozita kërkoi më shumë kohë.
Kryeministri tha se ka besim se do të arrihet një marrëveshje e mirë, dhe se nuk ka rëndësi se më kë e firmos marrëveshjen. Ai tha se nuk shikon fare më kë bisedon, pasi për të është njësoj si Basha dhe Bardhi.
Kryeministri u shpreh i gatshëm t’i japë kohë palavë, por ishte i qartë kur tha se afati i fundit i diskutimeve është fundi i muajit korrik.
“Diskutimi ishte interesant, ne sigurisht që nuk është se thamë ndonjë gjë të re, gjëra që ju i dini, që opinioni publik i di, kemi qendrim të qartë, dhe ka një realitet politik i cili imponon një qasje që për ne është e diktuar le të themi, si forca më e madhe, por që kemi dhe detyrimin të krijojmë një proces dhe të arrijmë në një rezultat ku nëse të gjitha palët nuk janë 100% dakord, së paku secila nga palët të ketë pjesën e vetë le të themi. Në këtë aspekt është e rëndësishme të diskutojmë, të vazhdojmë të diskutojmë, pa ndërprerje, që nesër domethënë, përfaqësuesit e opozitës jashtë parlamentare kërkuan kohë. Por ne ndërkohë kemi një kalendar i cili e ka një kufi të përcaktuar, fundi i muajit korrik. Besoj që diskutimi ishte pozitiv. Koha ka kufizimin e vetë. Hapja e listave për ne nuk është një variant, por angazhim karshi njerëzve. Duhet të çojmë deri në fund angazhimin e nënshkruan në 5 qershor. Është një proces me dy korsi, ku stacioni është 30 korriku.
Unë personalisht shoh se në këtë rast është shumë e rëndësishme përmbajtja e çështjes se sa përmbajtja e delegocioneve. Është zgjedhja e tyre të vijnë të përfaqësuar me këdo që dëshiron. Mjafton që kushdo që vjen këtu ka një mandat përfaqësimi të opozitës. Për mua s’bën asnjë dallim nëse është Gazment Bardhi apo Basha.
Ne jemi më të mëdhenjtë dhe janë 2 palë të vogla që i duan të gjitha për veten e tyre dhe nuk hapin rrugë njëra-tjetrës. Do mundohemi t’i bindim opozitën parlamentare që të jenë më fleksibël në këtë proces. Mbase do arrijmë që të kemi një mbështetje që të jetë e mjaftueshme. Opozita parlamentare nuk është vetëm një parti politike, janë shumë parti, shumë individë. Kanë qëllime të përbashkëta. Duhet të prevalojë arsyeja që nuk mund t’i kesh të gjitha, por edhe që të tjerët të marrin diçka.
Për sa i përket lëshimeve unë nuk e di se çfarë duhet të lëshojë më PS. Sepse ne kemi mbajtur një pozicion shumë të ekuilibruar. Që produkti të jetë sa më gjithëpërfshirës”, tha Rama.
