Kryeministri Edi Rama gjatë seancës së sotme plenare vendosi theksin tek rritja e pagës mesatere dhe përmirësimit të ekonomisë së vendit. Rama u ndal tek disa tregues që sipas tij tregojnë se është rritur standardi i jetësës së shqiptarëve siç është konsumi i rritur në krahasim me periudhën para pandemisë apo shifrat në aeroportin e Rinasit. Në fjalën e tij kryeministri tha se tashmë në atë që e quan ‘Shqipëria sot’, njerëzit nuk vijnë me bukë me vete në aeroport por janë konsumatorë.
“E vërteta e thjeshtë është se ekonomia është rritur ndryshe nga sa është thënë këtu. Papunësia është nën nivelet e para pandemisë, konsumi është rritur. Përvuajtja lënguese nuk provohet në shifrën e konsumimit. Është rritur. Eksportet janë rritur. Të gjitha këto nuk janë opinione. Nuk janë shifra të nxjerra nga mënga sipas qejfit. I gjen në çdo raport dhe tabelë. Kështu që është e kotë, fare…të bëjmë debat e lagu apo nuk e lagu përballë faktit kuptimplotë që kjo shumicë po bën rritjen më të madhe historike të pagave. Shqipëria me pagë mesatare 900 euro është Shqipëri tjetër. Merrni dhe shikoni shifrat e aeroportit të Rinasit për të kuptuar se çfarë Shqipërie është kjo sot. Janë konsumatorë, nuk vijnë me bukë me vete. Janë eksporti më i madh i Shqipërisë. Në këtë Shqipëri është koha që pagat të zënë vendin që meritojnë në këtë fazë. Nuk mbaron këto por ndalojmë një moment për të vlerësuar faktin. Pagat nuk i rrit shteti. Por kemi bërë që pagat në sektorin privat të jenë në rritje të përditshme. Nuk ka pasur përgjigje më spektakolare se ajo e 14 majit. Për të gjithë! Më shumë se fitorja jonë, është disfata që bartet nga të gjithë ju që këndoni dokrat tuaja. Po e morët vesh, merreni!”, u shpre Rama në fjalën e tij në Kuvend.
