Komisionerja e Bashkimit Europian, Mariya Gabriel ka reaguar pas akuzave të kryeministrit Rama se BE është duke bërë fushatë për zgjedhejt në Shqipëri edhe pse nuk i lejohet. Gabriel ka thënë për A2 CNN se ka marrë pjesë në Tryezën e Rrumbullakët të Arsimit, me ftesë të Universitetit të Vjenës, që kishte organizuar eventin dhe se ka mbajtur vetëm një fjalim.
“Pjesëmarrja ime ishte e kufizuar në mbajtjen e një fjalimi. Fjalimi përqendrohej në iniciativat e reja dhe iniciativat e ardhshme evropiane në fushën e arsimit dhe kërkimit shkencor, që janë të rëndësishme edhe për rajonin e Ballkanit Perëndimor, përfshirë Shqipërinë”, ka thënë ajo.
Më herët kreu i PD, mori pjesë në të njëjtën konferencë me Komisioneren e BE dhe kjo gjë u komentua nga kryeministri Rama i cili e quajti ndërhyrje në zgjedhje dhe për këtë kërkoi reagim nga Brukseli.
“Dikush në Bruksel duhet t’u thotë komisionerëve që harxhojnë kohën e punës së paguar nga taksat e popujve të Europës, për të bërë videomuhabete elektorale me Lulëzim Bashën, se kjo quhet ndërhyrje në fushatën e brendshme elektorale të një vendi kandidat për në BE! Në dijeninë time Komisioni Europian nuk e ka zakon të fusë hundët në fushatat elektorale dhe unë pres ta mësoj zyrtarisht e publikisht nga Brukseli, nëse e kam unë gabim e ndoshta komisionerët kanë vërtetë të drejtë të bëhen palë kur popujt e Europës zgjedhin qeveritë e tyre!”, tha Rama.
Ndërkohë gjatë takimit Komisionerja Gabirel u shpreh se BE do të përdorte çdo mjet në dispozicion për të rritur bashkëpunimet mes Shqipërisë dhe BE-së.
“Ju siguroj që, ne do të përdorim të gjitha mjetet dhe iniciativat në dispozicion përfshirë agjendën e ardhshme – Agjenda e Ballkanit Perëndimor në Inovacion/Zhvillim e sipër, Kërkim Shkencor, Kulturë, Arsim dhe Rini për të avancuar bashkëpunimin tonë dhe për të rritur rimëkëmbjen socio-ekonomike dhe konvergjencën me BE”, tha Gabriel.
