Edi Rama është larguar sërish nga Shqipëria. Ndalesa e radhës: Shtetet e Bashkuara të Amerikës, ku do të marrë pjesë në dasmën e Aleks Soros, djalit të miliarderit George Soros, që martohet më 14 qershor me Huma Abedin. Ndërsa vendi përballet me kriza të shumta dhe shqiptarët përpiqen të mbijetojnë, kryeministri ndjek jetën e luksit dhe rrethet që i garantojnë pushtet, influencë dhe mbështetje ndërkombëtare.
As këtë 12 qershor, Rama nuk ka bërë përjashtim. Teksa Partia Socialiste shënon një përvjetor të rradhës që, të paktën për sy e faqe, mund të shërbente për reflektim, ai ka zgjedhur sërish të mos jetë. Jo për ndonjë arsye shtetërore apo emergjencë kombëtare, por për të qenë i pranishëm në një ceremoni martesore luksoze, të organizuar në qarqet më të larta elitare globale. Asnjë aktivitet, asnjë mesazh për partinë që drejton prej më shumë se një dekade – vetëm një tjetër shfaqje e përçmimit të zakonshëm ndaj vendit dhe përgjegjësive.
E njëjta sjellje që ka shoqëruar çdo dalje të tij jashtë vendit. Me charter luksoz, i shoqëruar nga sigurime private dhe një skuadër zyrtarësh të administratës, Rama udhëton nëpër botë me paratë e po atyre shqiptarëve që detyroi të largohen, që sot jetojnë me borxhe dhe i dërgojnë të afërmve të tyre remitanca për të mbijetuar.
Në nëntor të vitit të kaluar, një tjetër vizitë në SHBA u justifikua me një takim me diasporën, ndërsa në të vërtetë u zbulua se kishte shkuar për ditëlindjen e Aleks Soros dhe për të ndjekur një ndeshje basketbolli të NBA-së me bileta që arrinin deri në 8 mijë dollarë. Asnjë transparencë për kostot. Asnjë llogaridhënie për shpenzimet. Asnjë reflektim për paradoksin që krijohet kur kryeministri i një vendi të varfër investon energjinë e tij në qejfe personale.
Në vend që të përballet me realitetin e hidhur të shqiptarëve, ku 24% e familjeve marrin borxh për të blerë ushqime dhe 23% për të përballuar shërbime shëndetësore, Rama i zhytur në luks shfaqet i shqetësuar vetëm për marrëdhëniet me Sorosët dhe axhendat e tyre.
Takimet elektorale me diasporën janë kthyer në paravan për këto udhëtime. Në Londër, Athinë, Milano apo Selanik, qeveria ka mobilizuar një ushtri zyrtarësh për të siguruar pjesëmarrje në aktivitete që nuk kanë asnjë lidhje me shtetin, por vetëm me Partinë Socialiste. Kryebashkiakë, deputetë, drejtues institucionesh – të gjithë udhëtojnë me buxhetin e shqiptarëve, ndërkohë që në Shqipëri pensionistët jetojnë falë ndihmës nga fëmijët emigrantë dhe studentët largohen për një të ardhme më të sigurt jashtë vendit.
E gjithë kjo është bërë pjesë e një skeme ku fushatat elektorale financohen në mënyrë të tërthortë me fondet e shtetit. Ambasadorë të emëruar politikisht janë kthyer në agjentë elektoralë të PS-së, duke organizuar takime partiake në emër të shtetit shqiptar, një shkelje e ligjit që dënohet me burg, por që ende nuk ka sjellë asnjë reagim nga institucionet e drejtësisë.
A ka turp kjo qeveri?
Ndërsa shqiptarët përpiqen të mbijetojnë, Edi Rama zgjedh dasmat, festat dhe lukset. Sepse për të, hallet e vendit janë vetëm një sfond i largët. Ai bën atë që di më mirë; të ndjekë interesat e veta. Dhe këtë nuk e fsheh. Nuk e ka fshehur asnjëherë.
