Kreu i ekzekutivit shqiptar, Edi Rama, ka ngritur padi ndaj Ramush Haradinajt.
Kjo padi është dorëzuar sot në Gjykatën Themelore në Prishtinë.
Akuzat kanë të bëjnë me deklaratat e përsëritura të Haradinajt se presidenti i Kosovës, Hashim Thaçin, ai i Serbisë, Aleksandër Vuçiç dhe Edi Rama kanë punuar në drejtim të realizimit të shkëmbimit të territorit ndërmjet Kosovës dhe Serbisë.
Me pretendimet se Haradinaj ka shpifur me deklaratat e tij, Edi Rama kërkon kompensim të dëmit.
Padia e Ramës përmban mbi 30 faqe, ku përmenden disa dalje publike në të cilat Haradinaj ka folur për këtë temë.
Lidhur me këtë padi ka reaguar edhe Haradinaj.
Nëpërmjet një statusi në Facebook, ai ka shkruar se padia e Ramës është plotësisht e pabazuar dhe se ai po tenton që t’i ikë përgjegjësive.
Kryeministri në detyrë i Kosovës shprehet se, sipas ligjit, ai do të përgatisë një përgjigje në padi.
Në fund e mbyll duke thënë se Kosova dhe kombi ynë ka njerëz që i dalin Zot në çdo kohë.
REAGIMI I HARADINAJT:
“Sot është raportuar në media se Kryeministri i Shqipërisë Edi Rama ka deponuar padi kundër meje në Gjykatë.
Unë, sipas ligjit, do të përgadis përgjigje në padi, në afatet e përcaktuara ligjore!
Padia e Kryeministrit Rama është plotësisht e pabazuar dhe një diversion politik që bëhet nga ana e tij, që të fshihet pas dramave mediale dhe t’i ikë përgjegjësisë.
Kombi ynë dhe Kosova ka njerëz që i dalin zot në çdo kohë.”
