Kryeministri Edi Rama dhe ministrja për Punët e Jashtme dhe Europën, Olta Xhacka do të shkojnë të hënën në Bruksel për një vizitë zyrtare. Në Bruksel pritet që ata të takohen me Josep Borrel ministër i BE për punët e jashtme dhe ndër të tjera do të diskutohet edhe për integrimin. Gjithashtu axhenda parashikon edhe një takim me Ursula von der Leyen presidente e Komisionit Europian, e cila ka mbështetur vazhdimisht Shqipërinë dhe ballkanit Perëndimor.
Dy prej çështjeve që pritet të diskutohen janë ecuria e progresit të Shqipërisë për integrimin në BE dhe gjithashtu ecuria e përdorimit të fondeve që Bashkimi Europian ka dhënë për rindërtimin pas tërmetit. Vizita e Ramës në Bruksel vjen pas qëndrimeve kritike që kryeministri ka mbajtur ndaj Unionit lidhur me shpërndarjen e pabarabartë të vaksinave anti COVID. Rama ka thënë më herët që BE e ka lënë në harresë Ballkanin Perëndimor.
Jo më larg se disa ditë më parë, Rama paralajmëroi edhe një vizitë në një vend të BE i cili Iika dhuruar vaksina Shqipërisë në dy raste, edhe pse emrin nuk ia ka bërë ende publik. Rama u shpreh se shteti në fjalë i kishte premtuar vendit tonë një sasi prej 360 mijë dozash të vaksinës Astra Zeneca, por është ende për t’u parë nëse kjo është e vërtetë.
