Teksa në vend çmimet janë në “stratosferë” dhe niveli i mirëqenies në nivele të ulëta, Berisha e ka shprehur këtë fenomen nëpërmjet një video.
Kryetari i Partisë Demokratike, Sali Berisha ka publikuar videon e një qytetari, i cili ka hyrë brenda një kazani plehrash për të mbledhur kanaçe.
Me anë të një statusi në rrjetet sociale, Berisha thotë se kjo është e vetmja gjë që qytetarit i ka mbetur për mbijetesë. Kreu i demokratëve përmend udhëtimet e kryeministrit Edi Rama, për të vënë në pah shpenzimet e këtij të fundit dhe ekonominë e qytetarëve.
“Kjo i ka mbetur për mbijetesë!
Ndërkohë Rama, 137 udhëtime me avion me dhomë gjumi luksoze në dispozicion.
Ai ka shpenzuar për këto fluturime 22 milionë euro. #sb”, shkruan Berisha.
Kujtojmë që sipas një studimi të fundit nga INSTAT, rreth 621 mijë shqiptarë jetojnë në rrezik varfëri. Të ardhurat e tyre janë shumë të ulëta ndërsa çmimet po rriten. Sipas avokatit të popullit një qytetari në Shqipëri i duhen 18 500 lekë për të jetuar në kushte minimale. Por pjesa më e madhe e pensioneve janë nën këtë shifër. Ndihma ekonomike apo pagat gjithashtu nuk garantojnë kushtet minimale për të jetuar. Kjo shifër është shumë me lartë në krahasim me ndihmat sociale në Shqipëri ku pagesat e papunësisë nuk e kalojnë shifrën e 15 000 mijë lekëve, mesatarja e ndihmës ekonomike arrin 6 500 lekëshin, ndërsa ajo e pensioneve nuk kalon 9 500 lekëshin.
