Vajza e kritikut të burgosur të Kremlinit Aleksei Navalny tha të martën se përpjekjet e autoriteteve ruse për të heshtur kritikët si babai i saj nuk do të funksiononin, megjithëse ajo gjithashtu shprehu shqetësimin në lidhje me rrëzimin e shpejtë të demokracisë në vendin e saj.
Daria Navalnaya bëri një paraqitje të pazakontë publike në një samit virtual të të drejtave të njeriut ku ajo pranoi një çmim për ‘guxim moral’ në emër të babait të saj, i cili po vuan një burgim 2 vite e gjysmë. Navalny, një nga kritikët kryesorë të Presidentit Vladimir Putin, thotë se akuzat kundër tij u sajuan për të penguar kundërshtimin e tij ndaj Kremlinit, diçka që këta të fundit e mohojnë.
“Për të gjitha këto vite, ai (Navalny) u ka treguar njerëzve në pushtet, të cilët po keqpërdorin paturpësisht atë pushtet, se kjo nuk do të funksionojë, se ne jemi shumica,” tha Navalnaya, duke folur nga Shtetet e Bashkuara. “Ne, qytetarët, do të vendosim se kush do të qeverisë vendin tonë dhe për sa kohë.”
Në fjalimin e saj, mbajtur në anglisht, 20-vjeçarja Navalnaya e përshkroi veten si një vajzë krenare dhe si një qytetare ruse, e shqetësuar për rrëzimin e shpejtë të demokracisë në vendin e saj.
Ajo foli për ndjenjat e saj të frikës dhe pafuqisë kur ishte fëmijë kur shtëpia e saj u bastis nga policia dhe gjithashtu për mënyrën se si ajo e mbështeti babanë e saj vitin e kaluar ndërsa ai ishte duke u rikuperuar në spital pas helmimit.
Navalny u trajtua në Gjermani për atë që mjekët gjermanë thanë se ishte helmim me një agjent nervor të shkallës ushtarake. Ai akuzoi Putinin për urdhërimin e helmimit, të cilin Kremlini e mohon.
Navalnaya tha se babai i saj i kishte shkruar asaj nga burgu duke kërkuar çmimin në ngjarjen e organizuar nga grupi me bazë në Gjenevë UN Ëatch për t’iu kushtuar të burgosurve politikë në Rusi dhe në aleatin e saj Bjellorusi, ku Presidenti Alexander Lukashenko akuzohet gjithashtu për burgosjen e kundërshtarëve .
“Shumica e tyre (të burgosurit politikë) janë në një situatë shumë më të keqe krahasuar me mua sepse nuk janë aq të njohur ose të famshëm. Por ata duhet ta dinë se nuk janë vetëm ose të harruar,” tha Navalnaya, duke cituar babanë e saj .
