Tregu i apartamenteve me qira po njeh një tendencë rritëse. Sipas të dhënave të INSTAT për muajin maj, çmimet e qirave janë rritur me 4.7% krahasuar me të njëjtën periudhë të vitit 2024.
Sipas ekspertëve të tregut imobiliar, ky zhvillim lidhet ngushtë me përfundimin dhe daljen në treg të projekteve të shumta ndërtimi që kanë nisur pas vitit 2021.
Investimet e reja, veçanërisht ato me cilësi të lartë dhe që ndodhen pranë zonave qendrore apo universitare, po përballen me kërkesë të shtuar dhe për rrjedhojë me çmime më të larta.
“Në zonat si qendra e Tiranës, Pazari i Ri apo Komuna e Parisit, qiratë fillojnë nga 500 euro dhe mund të arrijnë deri në 1100 euro në muaj, në varësi të cilësisë së ndërtesës dhe mobilimit”, shpjegon agjenti imobiliar Orgest Beti. “Në zona më periferike, si Astiri, Fresku apo Ali Demi, çmimet janë më të përballueshme dhe variojnë nga 300 në 400 euro”.
Ai thekson se çmimi përcaktohet nga disa faktorë: vendndodhja, gjendja e pallatit dhe vitet e ndërtimit. Ndërtesat e vjetra, veçanërisht ato të ndërtuara para viteve ’90 dhe pa ashensor, janë më pak të kërkuara dhe kanë çmime më të ulëta.
Ekspertët parashikojnë që ky trend do të vijojë edhe në muajt e ardhshëm, sidomos me afrimin e sezonit akademik, kur studentët nga qytetet e tjera zhvendosen drejt Tiranës dhe qendrave të tjera universitare, duke rritur ndjeshëm kërkesën për banesa me qira.
