Kryeministri Edi Rama ka bërë të ditur se qeveria ka vendosur të mbyllë plotësisht platformën “TikTok” në Shqipëri për një periudhë njëvjeçare.
Vendimi do të realizohet brenda 6-8 javëve të para të vitit të ardhshëm, duke nisur nga 1 janari.
Rama theksoi se ky hap është marrë për arsye sigurie, pasi sipas tij, “TikTok” promovon përmbajtje të dëmshme për shoqërinë, ndërsa ka një politikat ndryshe në Kinë.
Ai po ashtu shtoi se gjatë periudhës së bllokimit do të monitorohen kufizimet e mundshme që mund të vendosen nga platforma dhe do të shqyrtohen reagimet e shteteve të tjera.
Ministrja e Arsimit, Ogerta Manastirliu, ka dhënë detaje të tjera në lidhje me masat për sigurinë digjitale.
Ajo njoftoi se mbi 80% e prindërve kanë kërkuar kufizimin e përdorimit të rrjeteve sociale, veçanërisht të “TikTok”.
Për këtë arsye, qeveria ka vendosur bllokimin e platformës dhe përforcimin e masave të sigurisë në shkolla, përmes instalimit të kamerave inteligjente dhe dyfishimit të numrit të oficerëve të sigurisë.
Ajo theksoi se në dy vitet e ardhshme do të ngrihet një strukturë e dedikuar për menaxhimin e sigurisë fizike dhe digjitale në institucionet arsimore, duke përfshirë bashkëpunimin me autoritetet lokale për mbrojtjen e fëmijëve.
