Është arritur që të zbardhet edhe dëshmia e efektivit të policisë N.Hadëraj, i cili qëlloi me armë për vdekje 25-vjeçarin Klodian Rashën.
Në dëshminë e tij në prokurori, efektivi i policisë ka thënë se i kërkoi 25-vjeçarit që të ndalonte dhe herë pas here ai kthehej. Efektivit i është dukur sikur ai po e qëllonte dhe prandaj i është kundërpërgjigjur.
Efektivi N.Hadëraj, nga Tepelena është shprehur para efektivëve të policisë se bashkë me kolegët e tij ishte në patrullim për të ruajtur respektimin e masave anti-COVID, pasi pas orës 22:00 nuk lejohet lëvizja.
Kujtojmë se 25-vjeçari humbi jetën pasi u qëllua me armë zjarri nga punonjësi i policisë në rrugën “Dritan Hoxha” në Tiranë. Ngjarja ka ndodhur rreth orës 01:45 në Laprakë.
Dëshmia e policit që qëlloi për vdekje 25-vjeçarin:
“I kërkova të riut të ndalonte për ta pyetur për arsyen e daljes por ai nuk u bind. Herë pas here kthehej dhe mu duk sikur më kërcënoi me armë dhe veprova. Isha turni i 3 ne pune.
Pas instruktazhit ne komisariat kam nisur patrullimin ne zone për te pare zbatimin e ligjit dhe të masave të vendosura nga Komiteti Teknik. Kam konstatuar në unaze një dalë të ri që sapo na pa u largua me vrap në mënyre të dyshimte.
Kam njoftuar sallën dhe i jam vënë në ndjekje ku herë pas here i kam bëre thirrje të ndalojë. I kërkova ta ndalojë për ta pyetur për arsyen e daljes por ai nuk u bind. Here pas here kthehej dhe mu duk sikur më kërcënoi me armë dhe veprova”,- ka thënë polici në dëshminë e tij./GazetaReforma.com/
