Ka ministra që bien për një firmë të gabuar, e ka ministra që ngjiten për çdo shkelje të mundshme. Belinda Balluku është shembulli i dytë. Sa më shumë akuza, aq më shumë mikrofona. Sa më thellë shkon SPAK, aq më shumë fjalime e takime pune.
Çudirat ndodhin vetëm në Shqipëri: sa më shumë të të kapin me dorën në qyp, aq më shumë e meriton podiumin.
Së fundmi në Athinë ajo foli për “Shqipërinë eksportuese të energjisë deri në 2030”. Foli për “bashkëpunim transatlantik” me SHBA-në dhe BE-në, për korridore e interkonjeksione, për një Shqipëri që do bëhet pjesë e lojës së madhe energjetike.
Në çdo rresht, një fjalor perfekt për t’u duartrokitur jashtë. Por prapa atyre fjalëve qëndron një ministre që SPAK e heton për tendera të manipuluar, për një sistem ku i shkruan një drejtori vartës “nga ti varet e ardhmja ime.”
Llogaraja e Belindës është vetëm “nxemja” për dosjen e saj në SPAK. E ndërkohë që hetimet zgjerohen, vijnë edhe dëshmi të reja si ajo e Behgjet Pacollit, i cili tha hapur atë që shumë e dinin, por pak e kishin guximin ta thonin:
Belinda Balluku ka paracaktuar fituesin e konçesionit për ndërtimin e aeroportit të Vlorës dhe përcaktonte edhe nënkontraktorët që do të kryenin punimet për ndërtimin e strukturave të aeroportit.
E tha me emër dhe me projekt konkret: një hangar 21.2 milionë euro për aeroportin e Vlorës. Takimi, sipas tij, ka ndodhur në Kryeministri. Pra, me Edi Ramën në tavolinë.
Asnjë reagim nga Rama. As shenjë pezullimi, as koment, as distancim. Heshtje e plotë.
Teksa lajmet vlojnë dhe akuzat bëhen gjithnjë e më të rënda, edhe deklarata e Pacollit na duket tashmë normale. Sepse Belinda e ka kapur Ramën prej veshi.
Dhe ai, i pafuqishëm përballë skandaleve që i shpërthejnë në qeveri, qëndron në heshtje. E duket se nuk është më çështje besimi, por dobësie. Balluku është figura që i kujton çdo ditë se sistemi që ka ndërtuar nuk komandohet më prej tij, por mbahet në këmbë nga njerëz si ajo.
E ka kapur prej veshi dhe nuk e lëshon. Dhe ai, që i ka quajtur të tjerët “vegla të sistemit”, është bërë vetë vegël në dorën e sistemit që krijoi.
Rama, që dikur fliste për “rilindje institucionale”, është shndërruar në peng politik të bashkëpunëtorëve të vet.
Një qeveri që nuk pastron dot as vetveten, nuk mund të flasë për reformë. Një kryeministër që nuk ka më autoritet të kërkojë dorëheqje nga askush, nuk drejton më, vetëm mbulon.
Mediat, që prej kohësh kanë humbur misionin, në vend që t’i kërkojnë llogari, i japin skenë. I lëshojnë mikrofonin një zyrtareje që përmendet çdo ditë në dosjet e hetimit, një zyrtareje që çdo ditë i shtohet një aferë e re.
Por, Belinda Balluku është vetë fotografia e qeverisë, që e di se në vendin tonë drejtësia vonon, e pushteti harron…
