Teksa tashmë është hapur zyrtarish muaji i fushatës zgjedhore për lokalet e 14 majit, Komisioni Qendror i Zgjedhor ka publikuar fletën e votimit se si do të renditen kandidatët që garojnë për drejtimin e bashkisë së Tiranës. Në garë janë 6 kandidatë për të marrë drejtimin e bashkisë më të madhe në vend.
Pas shortit të hedhur më herët në ambientet e KQZ, goglat vendosën që i pari në fletën e votimit të renditet Arlind Qori nga Lëvizja Bashkë.
I dytë në listë është Marko Dajti i Frontit të Majtës, ndërkohë që e treta në fletën e votimit do të jetë Lajla Përnaska nga Drejtësi, Integrim dhe Unitet.
Goglat caktuan kreun aktual të bashkisë Erion Veliaj të renditet i katërti në listë, ndërkohë që pas tij vjen Belind Këlliçi i koalicionit opozitar “Bashkë Fitojmë” dhe Roland Bejko që garon nën siglën e Partisë Demokratike. Kujtojmë se pas vendimit të KQZ për t’i dhënë të drejtën Alibeajt duke e emëruar si kryetar të komanduar, nën siglën e PD do të ketë më shumë kandidatë për këshilla bashkiakë, jo për kryetarë, pasi shumë prej tyre u tërhoqën nga gara dhe iu bashkuan rithemelimit.
KQZ ka publikuar gjithashtu edhe modelin e fletës së votimit për anëtarë të Këshillit bashkiak për bashkinë e Tiranës.
Në listën e këshillave bashkiakë shtohen edhe disa parti të tjera që kanë vendosur që të mos nxerrin kandidatë për kryetarë bashkie, por synojnë vetëm këshillat.
