Shqipëria nuk po gjen qetësi nga publikimi i të dhënave sensitive, ku së fundmi është thyer sistemi “MEMEX”, në të cilin janë listuar të gjithë të kërkuarit nga Policia e Shqipërisë. “MEMEX” njihet edhe si Sistemi i Menaxhimit të Informacionit Kriminal dhe është mjeti kryesore në punën e Policisë së Shtetit. “MEMEX” mban të dhëna sekrete të policisë mbi çdo eksponent kriminal. Edhe pse sulmi kibernetik ka bërë “hapa pas”, tashmë po vazhdojnë të “dalin sheshit” të dhëna që janë marrë nga sistemet e goditura.
Sot grupi “Homeland Justice” ka publikuar të dhënat e sistemit MEMEX, i cili përmban listën e personave të dyshuar si të përfshirë në veprimtari kriminale.
Në dosjet e publikuara nga “Homeland Justice” janë emrat e 105 mijë shqiptarëve që kanë probleme me drejtësinë, ndërsa në fund të çdo faqe të secilit dokument shkruhet “Albanian suspects”. Pra, “shqiptarët e dyshuar”.
Por sigurisht që teksa ky sistem është thyer, një vëmendje e madhe shkon për Ervis Martinajt, kërkimi i të cilit shoqërohet me shumë mistere. Mes mijërave fotove dhe dokumenteve me të dhëna gjendet edhe emri dhe fotoja e Ervis Martinajt, si edhe të dhënat e tij, si datëlindja, vendi i lindjes, atësia dhe gjendja civile.
Siç duket edhe nga fotoja e siguruar nga “ABCNews”, në të dhënat e policisë gjendet një foto shumë e hershme e Martinajt, ku qartësisht duket 24 apo 25 vjeç.
Vlen të theksohet se fotoja duket e të paktën 15 viteve më parë, ndërsa nisur edhe nga fotot e publikuara sëfundmi, evidentohet shumë lehtë ndryshimi.
