Një rritje e papritur e rasteve të infeksionit nga Covid-19 ka qenë shqetësuese këto ditë në vendin tonë, ku sot u shënua shifra rekord me 69 raste të reja.
Gjeorgjina Kuli, anëtare e Komitetit Teknik të Ekspertëve dhe shefe e Pediatrisë në QSUT ka sqaruar sot rastet e rritura dhe faktorët që kanë ndikuar në këtë rritje.
Në një intervistë për ABC News ajo tha se rritja ka të bëjë me uljen e ndërgjegjësimit të qytetarëve dhe neglizhencës për rregullat e higjienës dhe distancimit social.
“Në fazën e parë ku infeksionet ishin më të ulta njerëzit ishin më të përgatitur dhe u zbatuan më së miri nga njerëzit, u duk sikur numri i infeksioneve ra dhe kjo bëri që të mendohej se koronavirusi po largohej nga vendi”, tha Kule.
Sakaq, Kuli tha se 88 fëmijë janë prekur nga Covid-19, në vendin tonë që prej fillimit të pandemisë, nga të cilët 70 % kanë qenë asimptomatikë ose me simptoma shumë të dobëta të Covid-19, teksa aktualisht janë 23 aktivë.
“Në momentin që flasim kemi 88 fëmijë të infektuar. Të gjithë fëmijët janë infektuar nga kontaktet e familjarëve. Pjesa më e madhe e tyre janë asimptomatikë ose me simptoma të lehta. Asnjë prej tyre nuk është i hospitalizuar”, tha mjekja.
Për sa i përket infektimit të stafit mjekësor mjekja Kule sqaroi se ambientet e shërbimeve shëndetësore janë vendet ku qarkullon më së shumti infeksionet dhe si të tilla infektimi mund edhe të ndodhë për shkak edhe të neglizhencës dhe mosrespektimit të protokolleve shëndetësore.
