Ndryshe nga sa pritej kjo javë ka qenë e paqëdrueshme, teksa ka shkuar në 494 numri i të prekurve nga Covid-19 në vendin tonë, pasi në 24 orët e fundit janë shënuar 19 raste të reja, teksa numri i viktimave ka shkuar në 25.
Ditën e sotme, shefja e epidemiologjisë në Institutin e Shëndetit Publik, Silva Bino, në një intervistë për Abc News, është shprehur se rastet e para të Covid-19 janë identifikuar që në muajin shkurt, kur ka filluar qarkullimi i sëmundjes, por nuk ka qenë intensive.
“Sigurisht që patëm, kemi pasur raste sporadike në fund të shkurtit. Më 28 shkurt janë shfaqur shenjat e para klinike. Ka filluar qarkullimi i sëmundjes, por jo intensiv. Që në fund të janarit ne kemi filluar gjurmimin epidemiologjik të gjitha formave të rënda. Pavarësisht se gripi është një virus i paparashikueshëm. Nuk kishim gjasa që ta masnim, pasi në 7 janar Kina ndau sekuencën dhe ju dha mundësia botës për të përgatitur testet dhe në fund të janarit kemi pasur testet”, u shpreh Bino.
Sa i përket Shkodrës që është kthyer në një vatër të nxehtë me 71 raste, Bino tha se qytetarët nuk kanë zbatuar masat e marra nga qeveria dhe janë asimptomatik.
Sipas saj, rastet në Shkodër u zbuluan pas hetimit epidemiologjik, pasi ndryshe do ishte e pamundur sepse nuk kishte njerëz të sëmurë.
“Shkodra ka bërë shumë tepër teste se rrethe e tjera. Masat e distancimit social nuk janë zbatuar. 60% e rasteve të cilat janë testuar në Shkodër janë asimptomatik. Kjo është bërë në bazë të gjurmimit dhe testimit. Në fillim testohen persona të cilat kanë shenja, pasi kjo nuk është një sëmundje që e bëra testin dhe nuk kam gjë. Duhet kuptuar që duhet të jesh në kontroll dhe duhen marrë disa masa të distancimit social. Kjo nuk është pandemia më e keqe që ne presim”, u shpreh Bino.
Prej ditësh kryeministri Rama ka paralajmëruar lehtësimin e masave të marra në kuadër të parandalimit të përhapjes së koronavirusit, pasi sipas tij kurba e ka kaluar pikun dhe tashmë po shkon drejt rënies.
Ditën e djeshme, kreu i qeverisë me anë të një reagimi në Facebook, ka paralajmëruar se brenda 10 ditëve mund të nis hapja e shumë aktiviteteve duke ndjekur modelin e Austrisë, që sipas tij ka një hapje të ngjashme në Shqipërinë, por më të avancuar në kohë me rreth 10 ditë.
Më tej, Rama citon edhe fjalët e kancelarit Sebastian Kruz, i cili u shpreh: “Aq liri sa të jetë e mundur, aq shtrëngime sa të jetë e nevojshme”.
