Asambleja Kombëtare e Partisë Socialiste do të mbahet me 2 shtator në orën 10:00 në Pallatin e Kongreseve. Këtë e ka zbuluar Sekretari i Përgjithshëm i PS, Taulant Balla. Ai ka dërguar anëtarëve një mesazh ku thuhet se duhet të merren masat për pjesëmarrjen në Asamble.
“Të nderuar anëtarë të AK!Ju njoftojmë se ditën e Enjte, datë 2 Shtator 2021, ora 10.00, do të zhvillohet mbledhja e Asamblesë Kombëtare të Partisë në Pallatin e Kongreseve Tiranë. Rendi i Ditës së kësaj mbledhje do të njoftohet nesër. Lutemi merrni masat për pjesëmarrjen e domosdoshme në këtë mbledhje!”
Në asamble pritet që kryeministri Edi Rama të shpallë emrat e qeverisë së re që do të qeverisin për 4 vitet e ardhshme. Në Partinë Socialiste do të mungojnë disa figura të njohura duke filluar nga Gramoz Ruçi, i cili është tërhequr nga politika. Erjon Braçe po ashtu ka paralajmëruar largimin nga qeveria. Përmes një statusi në Facebook shkruan se “ka një fund”.
Najada Çomo dha dorëheqjen nga mandati i deputetes duke mos ardhur në Kuvend këtë shtator për të vazhduar punën në spital si Shefe e Shërbimit Infektiv.
Nga ana tjetër, Rama rikonfirmoi në detyrë kreun e grupit parlamentar socialist, Taulant Ballën, dhe ministren e Shtetit për Marrëdhënien me Parlamentin, Elisa Spiropalin.
Ndërsa, Partia Demokratike do të thërrasë Këshillin Kombëtar ditën e nesërme në orën 18:00. Aty do të diskutohet për: zgjedhjen e Kryetarit të Këshillit Kombëtar; Zgjedhja e Kryesisë dhe Sekretariatit të Partisë; e Kryetarit të Komisionit të Apelimit, Integritetit dhe Etikës; e Komisionit Zgjedhor; dhe të Bordit Financiar të Partisë; Caktimi i drejtuesve te Departamenteve të Këshillit Kombëtar si dhe njoftimin e përbërjes së Kryesisë së Grupit Parlamentar të PD-së.
