Më herët sekretari i përgjithshëm i Partisë Demokratike, Gazment Bardhi , ka deklaruar se Partia Socialiste ka bojkotuar Komisionin Hetimor që është ngritur për zgjedhjet e 25 prillit.
Pas deklaratës së opozitës ka reaguar me anë të një njoftimi zyrtar kryesia e Kuvendit të Shqipërisë.
Në njoftimi për mediat, Kuvendi ka sqaruar se mbledhja nuk u zhvillua për shkak të mungesës së kourumit të nevojshëm. Gjithashtu bëhet me dije se mbledhja e radhës do të mbahet pasnesër.
“Të nderuar kolegë,
Ju njoftojmë se mbledhja e sotme e komisionit hetimor parlamentar “Për kontrollin e veprimtarisë së organeve të administratës publike dhe pushtetit vendor, për të verifikuar përdorimin e burimeve të administratës shtetërore për qëllime elektorale në zgjedhjet e 25 prillit 2021” nuk u zhvillua për shkak të mungesës së kourumit të nevojshëm.
Kryetari i këtij komisioni z.Enkelejd Alibeaj ngarkoi Sekretariatin Teknik të këtij komisioni të njoftojë anëtarët se mbledhja e ardhshme e komisionit hetimor do të zhvillohet më datën 22 tetor 2021, ora 10:00. Faleminderit!”, thuhet në njoftimin zyrtar.
Më herët Bardhi u shpreh se vetë ata që vodhën zgjedhjet përdorën krimin dhe paratë e korrupsionit për ti blerë , ndërsa shton se opozitën nuk do ta pengojnë dot që të ushtrojë të drejtën për hetimin parlamentar të masakrës së 25 prillit.
“Bojkoti i Komisionit Hetimor për masakrën zgjedhore të 25 Prillit nga anëtarët e Partisë Socialiste është dëshmi e qartë e papërgjegjshmërisë së tyre në raport me interesin e qytetarëve. Edhe pse kërkuar vetë që mbledhja e Komisionit të vijonte në datën 20, sot zgjodhën bojkotin.
Është e qartë që ato që vodhën zgjedhjet, përdorën krimin dhe paratë e korrupsionit për të blerë vota, që përdorën shtetin në zgjedhje, nuk kanë interes për të faktuar masakrën zgjedhore. Opozitën nuk e pengojnë dot në ushtrimin e të drejtave dhe përgjegjësive të saj për hetimin parlamentar të masakrës zgjedhore të 25 Prillit”, është shprehur Bardhi.
