“Ju që rrini në radhë për të takuar kriminelin Rama, nuk jeni shqiptarë. Shqiptarët e vërtetë janë këtu që protestojnë kundër një narkoregjimi. Hajdeni këtu, bashkohuni me shqiptarët!”
Këto janë disa nga thirrjet e shqiptarëve opozitarë gjatë protestës kundër qeverisë Rama, të organizuar në Londër pak para takimit të kryeministrit Edi Rama me diasporën.
Protestuesit i bënë thirrje pjesëmarrësve në takim që të braktisin ngjarjen dhe t’i bashkohen protestës kundër kreut të qeverisë.
Nën masa të rrepta sigurie, opozitarët janë mbledhur për të protestuar me pankarta në duar përpara sallës ku pritet të zhvillohet takimi i kryeministrit me shqiptarët.
“Poshtë Edi Rama! Rama ik! Hajduta! Rroftë Sali Berisha!” Janë disa nga thirrjet e tjera të protestuesve opozitarë në Londër.
Demokratët kundërshtojnë takimin e Ramës me diasporën në Londër, pasi sipas tyre ai është shkaktari i largimit të shqiptarëve nga vendi.
Ky është rasti i tretë kur kryeministri Edi Rama përballet me protesta gjatë takimeve me diasporën. Herën e parë u protestua në SHBA, ndërsa së fundmi një protestë e ngjashme u zhvillua në Selanik.
