Mjekët kanë dalë sot në protestë për shkarkimin e kolegut të tyre, mjekut të Yrgjencës paraspitalore në QSUT, Ilir Allkja.
Mjekët janë mbledhur para Urgjencës për të shprehur indinjatën e tyre për këte vendim që ata e cilësojnë të padrejtë.
Mjeku Allkja bëri denoncime të forta, lidhur me trajtimin e pacientëve dhe kushtet jo të përshtatshme, si qëndrimi në ambulancë për orë të tëra. Ai u thirr nga spitali për këtë arsye dhe një javë më pas, ditën e djeshme i është komunikuar me një letër shkarkimi nga puna për shkelje të etikës.
Sindikata e Mjekëve paralajmëron qysh dje pasdite protestën. Sipas tyre, në një kohë kur bota është krizë për staf mjekësor, Shqipëria me një numër të vogël të personelit shëndetësor, pushon një mjek nga puna duke ia atribuuar arsyet përplasjeve politike.
“E RËNDË Në një situatë kur gjithë bota është në krizë për staf mjeksor, Shqipëria, ky vend i vogël me mungesë të personelit shëndetësor ka luksin të pushoj mjek nga puna për arsye politike.
Kush e ndjen që mund ti bashkohet një proteste në orën 10.00 në Sheshin përpara spitalit 1 Nënë Tereza në kundërshtim të vendimeve të tilla dhe në mbështetje të personelit shëndetësor që po punon në kushte sfilitëse vetmohuese, është i mirëpritur. Faleminderit!”, thuhet në njoftim
Shkarkimi
QSUT shkarkoi nga detyra mjekun e Urgjencës Ilir Allkja.
Vendimi u mor gjatë ditës së sotme nga drejtori Enkelejdi Joti i cili deklaroi se Allkja ka shkelur etikën e punës duke publikuar materiale konfidenciale përmes komunikimeve të tij në rrjetin social Facebook si edhe në media.
Qendra Spitalore Universitare “Nënë Tereza” ndërpret punën me mjekun e Urgjencës, Ilir Allkja. Sipas QSUT-së, Allkja ka shkelur kodin etik të punonjësit, prandaj edhe nuk duhet të vijojë të jetë më mjek pranë këtij shërbimi shtetëror. Në dokumentin e QSUT theksohet se Alljka nuk duhet të bëjë deklarata të papërshtatshme të tilla si vërejtje mbi politikën apo programe të institucionit dhe sulme kundër administratës dhe se çdo rast të daljes së tij është i detyruar të merrte më parë konfirmimin mbi qëndrimin institucional pranë zyrës së marrëveshjeve me publikun, dhe në asnjë rast të shkelë këtë kod.
“Çdo punonjës gëzon lirinë e opinionin personal por duhet të respektojë ruajtjen e konfidecialitetit në qëndrimet apo deklaratat me mediat të shkuara apo elektronike. Punonjësi i QSUT-së nuk duhet të bëjë në publik komente të papërshtatshme të tilla si vërejtje mbi politikën apo programe të institucionit, Deklarata dhe opinionet personale që mund të interpretohen si zyrtare, sulme kundër administratës ose punonjësve të tjerë të institucionit”, thuhet në dokumentin e QSUT-së për shkarkimin e mjekut.
/Gazetareforma.com/
