Qytetarë dhe familjarë të 14-vjeçarit Martin Cani, i cili humbi jetën pas një konflikti në shkollën 9-vjeçare “Fan Noli”, janë mbledhur këtë pasdite për të kërkuar drejtësi.
Ata vendosën lule pranë shkollës në nder të kujtimit të tij dhe bënë thirrje për zbardhjen e plotë të ngjarjes, duke ngritur dyshime se persona të tjerë mund të jenë të përfshirë në krim dhe ende të lirë.
Pas protestës para shkollës, pjesëmarrësit iu bashkuan një tubimi qytetar para Ministrisë së Shëndetësisë, duke protestuar edhe për vdekjen e 12-vjeçarit Leo Sadiku.
Martin Cani humbi jetën më 18 nëntor, pasi u godit me thikë nga bashkëmoshatari i tij, Mario Përlleshaj, pas një konflikti që nisi në oborrin e shkollës dhe agravoi jashtë saj.
Pasi u plagos rëndë, ai u përpoq të kërkonte ndihmë, por humbi ndjenjat dhe ndërroi jetë në spital. Në ngjarje mbeti i plagosur edhe shoku i tij i ngushtë, Luis Meçja, si dhe vetë autori, i cili më pas u trajtua në një spital privat.
