Pas tragjedisë së vrasjes së 14-vjeçarit Martin Cani, i cili humbi jetën një ditë më parë pas një sherri pranë shkollës “Fan Noli” në Tiranë, qytetarët kanë paralajmëruar një marshim-protestë për të kërkuar drejtësi dhe masa më të forta sigurie në shkolla.
Protesta do të zhvillohet të enjten, më 21 nëntor, në orën 11:00 dhe do të nisë nga shkolla “Fan Noli”, për të përfunduar para Ministrisë së Arsimit.
Prindërit, mësuesit dhe qytetarët janë ftuar të bashkohen në këtë marshim, nën moton: **“Prindërit në protestë për jetën, sigurinë dhe arsimin e fëmijëve!”**.
Kjo protestë është një reagim i fuqishëm ndaj dhunës që ka ndodhur në shkolla, dhe prindërit kërkojnë masa urgjente për të parandaluar incidente të tilla në të ardhmen.
Ata theksojnë nevojën për një rritje të menjëhershme të sigurisë në shkolla dhe një angazhim më të madh për edukimin e fëmijëve për të shmangur dhunën.
