Protestat e opozitës jashtë Parlamentit sigurisht që kanë qenë shumë të komentuara, mirëpo pyetja që shtrohet sa herë protestuesit mblidhen jashtë dyerve të institucioni është “Çfarë ndiejnë deputetët që janë aty brenda?”. Me të drejtë lind kjo pyetje dhe ditën e sotme vet ish-ministri i Financave dhe kryetari i Komisionit të Financave dhe Ekonomisë, Arben Ahmetaj i ka kthyer përgjigje.
Nga studio e “Kjo Javë”, Ahmetaj ka thënë: “Ç’do bëjnë, do të na rrahin? Ne jemi në rrugë çdo ditë”. Një farë e drejte në fjalët e Ahmetaj është megjithatë zemërimi i asaj pjese të popullatës të mbledhur aty nuk duhet neglizhuar, pasi mund të arrijë deri në akte dhune.
“Emocioni i parë keqardhje që opozita nuk është. Zihemi e sherrosemi, por është pjesë e rëndësishme në Parlament. Plus ka burra e gra të mençur që debatojnë mirë. Kam vlerësim për shumë, por nuk po hyj në emra. Ndjesia e dytë, si mundet që PD të sjellë njerëz të rrethojë parlamentin. Flisja me shumë policë atë ditë, kisha një ndjesi të rëndë, që njerëz fyenin e godisnin policinë. Tentojnë të çajnë kordonin, po ç’do të thotë, do hyni të na rrihni ne? Po ne në rrugë jemi çdo ditë. Ja u futën brenda, çdo bëjnë? Do nxjerrin deputetët jashtë? Po ku e keni parë këtë? Ndjesia e tretë, mendoj sa dëm i bëhet Shqipërisë për atë imazh që krijohet. Dëmi është i madh, në ekonomi, në imazh në aspiratat për BE. Këto janë tre ndjesitë e vërteta, aspak politike”, u shpreh ish-ministri socialist.
